Ulybrıtanııada mindetti aǵza donorlyǵy týraly jańa zań qabyldandy

Ulybrıtanııada Mindetti aǵza donorlyǵy týraly zań jyl saıyn myńdaǵan adamdy ajaldan arashalap keledi. Zańǵa sáıkes 18 jastan asqan azamattar tiri kezinde ózi tyıym salmasa, qaıtys bolǵan jaǵdaıda aǵzalary avtomatty túrde muqtaj jandarǵa beriledi, dep habarlaıdy Kazinform tilshisi.

Kıra Boll 9 jasynda kólik apatynan qaıtys boldy. Ata-anasy qaıǵy jutyp qınalsa da qyzynyń aǵzalaryn birneshe adamǵa bólip berýge kelisken.

«Kırany joǵaltyp alǵanymyz óte ókinishti. Ony aman alyp qalý múmkin bolmady. Biraq qyzym 4 adamǵa ómir syılady», - deıdi Kıranyń anasy Loanna Boll.

«Donorlyqqa kelisimimdi suraǵanda Kıraǵa qaradym da bár sát oılandym. Eger qyzymnyń tańdaý múmkindigi bolsa, ol keliser edi dedim. Óıtkeni Kıra tabıǵatynan óte meıirimdi jan edi», - deıdi Kıranyń ákesi Djo Boll.

Ómirin saqtap qalǵandardyń arasynda 9 jasar Maks Djonson da bar. Vırýstyq ınfektsııadan keıin júrek talmasyna dýshar bolǵan bala donordyń arqasynda qazir din-aman.

«Shynymdy aıtsam, men ólýge daıyn boldym. Áke-sheshemdi qushaqtap, olardy sońǵy ret kórip otyrmyn dep oıladym», deıdi retsıpıent Maks Djonson.

«Donorǵa degen alǵysymyz sheksiz. Sózben aıtyp jetkizý múmkin emes. Ata-anasy óte qıyn kezeńde basqalardyń ómiri týraly oılady», - deıdi Makstyń anasy Emma Djonson.

Bul oqıǵa Mindetti aǵza donorlyǵy týraly jańa zańnyń qabyldanýyna túrtki boldy. Premer-mınıstr bastama kóterip, mańyzdy qujatqa qol qoıyldy jáne ony «Maks pen Kıra» zańy dep atady. Sodan beri kenet qaıtys bolǵan adamnyń búıregi, júregi, ókpe-baýyry týysqandarynyń ruqsatynsyz muqtajdarǵa berilip júr. Eger adam tiri kezinde qarsylyǵyn onlaın bildirip ketpese, árıne.

«Qazir jaǵdaı múldem basqasha. Halyq arasynda jańa mádenıet qalyptasty. Búkil ulttyń aǵza donorlyǵyna degen kózqarasy ózgerdi jáne donor bolýdy abyroı sanaıtyndar kóp», deıdi Ulybrıtanııanyń Ulttyq densaýlyq saqtaý qyzmeti Transplantologııa damytý bóliminiń jetekshisi Kler Vıllıment.

Statıstıkaǵa sáıkes ótken jyly 4,5 myńǵa jýyq naýqas tiri nemese qaıtys bolǵan donordyń aǵzasyn paıdalanyp, aman qalǵan. Bul aldyńǵy jylmen salystyrǵanda bes paıyzǵa kóp. Deı turǵanymen, transplantatsııany saryla kútip júrgen 7000-nan astam adam áli de bar. Ótken jyly 400-den astamynyń kezegi jetpeı qaıtys bolypty.