Ulybrıtanııada mınıstr Djess Fıllıps narazylyq retinde qyzmetinen ketti
ASTANA. KAZINFORM – Ulybrıtanııanyń balalardy qorǵaý máseleleri jónindegi mınıstri Djess Fıllıps premer-mınıstr Kır Starmerdiń saıasatymen kelispeıtinin bildirip, qyzmetinen ketti, dep habarlaıdy AZERTADJ agenttigi.
AZERTADJ málimetinshe, bul otstavka bıliktegi Leıborıstik partııanyń 80-nen astam depýtaty Kır Starmerden qyzmetinen ketý merzimin jarııalaýdy talap etken tusta bolyp otyr.
– Daýdan qashý nıetimiz bizdiń sırek pikirtalas júrgizýimizge ákeledi. Sonyń saldarynan progreske múmkindik beretin ózgerister toqtap, keıinge shegeriledi. Men leıborıstik úkimettiń jumys istegenin qalaımyn. Biraq men ózim de, el de kútken ózgeristerdi kórip turǵan joqpyn. Sondyqtan qazirgi basshylyq kezinde mınıstr qyzmetin jalǵastyra almaımyn, – dedi Djess Fıllıps otstavka týraly hatynda.
Fıllıps 12 mamyr kúni qyzmetinen ketken brıtan úkimetiniń ekinshi múshesi boldy. Buǵan deıin turǵyn úı qurylysy, qaýymdastyqtar jáne jergilikti basqarý jónindegi mınıstrdiń orynbasary Mıatta Fanbýlle de Kır Starmerdiń baǵytymen kelispeıtinin aıtyp, qyzmetinen ketken edi.
Sońǵy táýlikte Qaýymdar palatasynda Kır Starmerdiń otstavkasyn talap etetin leıborıst depýtattardyń sany eki eseden astam ósip, 80 adamǵa jetti.
Narazy parlamentarıılerdiń pikirinshe, Starmerdiń qyzmette qala berýi partııanyń kelesi jalpy saılaýdaǵy pozıtsııasyn álsiretýi múmkin. Ulybrıtanııadaǵy kelesi parlament saılaýy 2029 jyldyń tamyzynan keshikpeı ótýi tıis.
Eske sala ketsek, buǵan deıin Bosnııa jáne Gertsegovına eliniń joǵary ókili Krıstıan Shmıdt otstavkaǵa ketkenin jazdyq.
