Ulybrıtanııada mıgranttarǵa qarsy narazylyq órship tur
ASTANA. KAZINFORM - Immıgranttarǵa qarsy narazylyqtar, ásire ońshyldar men polıtsııa qyzmetkerleriniń arasyndaǵy qaqtyǵystar Ulybrıtanııada tyıylmaı tur, dep habarlaıdy Kazinform tilshisi.
Radıkaldy toptar ıslam dinine qarsy urandar aıtyp, meshitterge, mıgranttar turatyn qonaqúılerge shabýyldar jasap jatyr. Úkimet basshysy mınıstrler jáne polıtsııa ókilderiniń qatysýymen shuǵyl keńes ótkizýge májbúr boldy.
Narazylyqtar bı sabaǵyna qatysqan úsh kishkentaı qyzdyń óliminen keıin bastaldy. Qyrǵyn kezinde taǵy on shaqty adam jaraqat aldy. Oqıǵa Anglııanyń teńiz jaǵalaýyndaǵy Saýtport qalasynda boldy.
Polıtsııa qylmystyń sebebin anyqtap jatyr, biraq onyń terrorızmmen baılanysy joq dep sanaıdy. Áleýmettik jelilerde qylmysker - radıkaldy musylman-mıgrant degen feık tarap, tolqýlardy údetti. Polıtsııa 17 jastaǵy kúdiktiniń Ulybrıtanııada dúnıege kelgenin habarlady.
“Áleýmettik jeliler arqyly jalǵan aqparat taratylyp, qatygezdiktiń kúsheıýine alyp keldi. Polıtseılerge kirpish laqtyrý, meshitterge shabýyl jasaý, dúkenderdi tonaý - bul múldem masqara qylmystyq áreket bolyp esepteledi. Kináliler mindetti túrde jazalanady,” dedi Ulybrıtanııa ІІM mınıstri Ivett Kýper.
Ulybrıtanııa premer-mınıstri COBRA tótenshe jaǵdaılarmen kúres komıteti músheleriniń basyn qosty. Mınıstrler, polıtsııa, barlaý qyzmetkerleri jáne basqa da jaýapty mamandar daǵdarys jaǵdaıynda departamentterdiń sheshim qabyldaýyn jáne jumystardy úılestirý barysyn talqylady.
“Bizdiń eldiń halqy qaýipsiz ómir súrýge quqyly. Degenmen, musylman qaýymdastyǵy músheleriniń qýdalanǵanyn, meshitterge shabýyldar jasalǵanyn, násilshilderdiń maǵynasyz zorlyq-zombylyqqa barǵanyn kórdik. Men bul úrdisti ásire ońshyldardyń qaraqshylyq áreketi dep ataımyn,” dedi Ulybrıtanııa premer-mınıstri Kır Starmer.
Polıtsııa jappaı tártipsizdikterge ásire ońshyldar uıymynyń tikeleı qatysy bar dep málimdedi. "Anglııa qorǵanys lıgasynyń" negizin qalaýshy Tommı Robınsonnyń áleýmettik jelilerde oqyrmany kóp. Ol óziniń ıdeıalaryn taratý úshin platformalardy belsendi paıdalanady. Buqaralyq aqparat quraldarynyń taldaýyna sáıkes, jeke adamdar halyqty narazylyqtarǵa qatysýǵa ıtermelep, ózderi tasada qalyp qoıyp júr.
