Ulybrıtanııada evtanazııa týraly zań jobasy qabyldanbady
ASTANA. KAZINFORM – Ulybrıtanııa parlamentiniń depýtattary jazylmaıtyn aýrýǵa shaldyqqan adamdarǵa óz erkimen ómirden ketý kezinde medıtsınalyq kómek kórsetýdi zańdastyrýdy kózdegen zań jobasyn qabyldamady, dep habarlaıdy Reuters.
Bastamaǵa 286 depýtat qarsy daýys berse, 270 depýtat qoldady.
Zań jobasy Anglııa men Ýelske qatysty boldy. Oǵan sáıkes, kámeletke tolǵan, sheshim qabyldaý qabileti bar, jazylmaıtyn aýrýǵa shaldyqqan jáne ómir súrý uzaqtyǵy alty aıdan aspaıdy dep boljanǵan naýqastar arnaıy komıssııanyń maquldaýynan keıin ómirin toqtatýǵa medıtsınalyq kómek ala alatyn edi.
Buǵan deıin osyndaı zań jobasy Qaýymdar palatasynda qoldaý tapqan bolatyn. Alaıda Lordtar palatasynda ony qaraý belgilengen merzimde aıaqtalmaǵandyqtan, zań qabyldanbady.
Jańa bastama parlamenttegi alǵashqy kezeńnen óte almady. Sondyqtan ony qazirgi zań shyǵarý sessııasynda qaıta qaraý múmkin emes. Bul sessııa kelesi jyldyń kóktemine deıin jalǵasady dep kútilýde.
Zań jobasyna qarsylar zańnamaǵa ózgeris engizý osal jáne aýyr naýqastarǵa qysym kórsetý qaýpin týdyrýy múmkin ekenin málimdedi. Al qoldaýshylar jazylmaıtyn aýrýǵa shaldyqqan adamdardyń ómirden óz erkimen ketý týraly sheshimdi óz betinshe qabyldaýǵa quqyǵy bolýy kerek dep sanaıdy.
Ulybrıtanııa úkimeti beıtarap ustanymda bolyp, depýtattarǵa jeke kózqarastaryna sáıkes daýys berýge múmkindik berdi.
Eske salaıyq, Frantsııa evtanazııaǵa resmı túrde ruqsat berdi.
