Ulybrıtanııada evreılerge shabýyl jasamaq bolǵan eki er adam ómir boıyna sottaldy

ASTANA. KAZINFORM — Prestondaǵy Koroldik soty 38 jastaǵy Valıd Saadaýı men 52 jastaǵy Amar Hýsseındi ómir boıyna bas bostandyǵynan aıyrdy. Polıtsııa málimetinshe, olar Manchesterdegi evreı qaýymyna shabýyl jasap, «Ulybrıtanııa tarıhyndaǵy eń qandy teraktini» uıymdastyrýdy kózdegen. Bul týraly VVS jazdy.

Olar tıisinshe keminde 37 jáne 26 jyl túrmede otyrýy kerek, sodan keıin ǵana shartty túrde merziminen buryn bosatýdy suraı alady.

Sottyń málimetinshe, aıyptalýshylar DAISh-ten (Qazaqstanda tyıym salynǵan uıym – red.) jigerlengen jospar aıasynda Ulybrıtanııaǵa qarý-jaraq kontrabandasyn uıymdastyrmaq bolǵan. Jospardyń áshkerelenýine jasyryn jumys istegen agent sheshýshi ról atqarǵanyn Úlken Manchester polıtsııasy habarlady.

Saadaýı Ýıgan aýdanyndaǵy Abram aýylynda turǵan, Týnıs týmasy, eki balanyń ákesi. Hýsseınniń turaqty mekenjaıy bolmaǵan.

Tergeý dereginshe, Saadaýı Ulybrıtanııaǵa tórt Kalashnıkov avtomatyn, eki tapansha men 900 oq-dári ótkizýdi josparlaǵan. Ol qarýǵa aldyn ala aqsha tólep, «Farýk» esimdi adammen kelisken, alaıda bul atpen jasyryn agent áreket etken.

2024 jylǵy 8 mamyrda ol Boltondaǵy qonaqúı avtoturaǵynda qarýdyń bir bóligin alýǵa kelgen kezde ustaldy. Operatsııaǵa terrorızmge qarsy bólimnen 200-den astam polıtsııa qyzmetkeri qatysqan, al qarý-jaraq jaramsyz kúıge keltirilgen bolyp shyqty.

Saadaýı áleýmettik jelide túrli jalǵan esimmen ashylǵan onǵa jýyq akkaýnt arqyly radıkaldy kózqarastar taratqan.

Saadaýı men Hýsseın 2023 jylǵy 13 jeltoqsan men 2024 jylǵy 9 mamyr aralyǵynda terakt daıyndaǵany úshin kináli dep tanyldy. Al Valıdtiń 36 jastaǵy inisi Bılel Saadaýı josparlanǵan shabýyldar týraly habarlamaǵany úshin alty jylǵa sottaldy.

Aıta keteıik, ótken aıda Ázerbaıjanda Izraıl elshiligine qarsy terakt jasaý áreketiniń joly kesildi.