Ulybrıtanııada elektr energııasy men kommýnaldyq qyzmetterdiń tarıfteri ósedi
ASTANA. KAZINFORM – Sáýir aıynan bastap mıllıondaǵan brıtandyq otbasylardyń jyldyq elektr energııasy tólemi 2334 AQSh dollaryna deıin ósedi, dep habarlaıdy Kazinform agenttiginiń menshikti tilshisi.
Brıtandyq energetıkalyq retteýshi Ofgem sheshimine sáıkes, 1 sáýirden bastap elektr energııasy úshin tólenetin shekti tólemder 6,4%-ǵa ósedi. Bul qymbattaý negizinen energııa tasymaldaýshylardyń kóterme baǵasynyń artýymen baılanysty.
Ortasha eseppen jyldyq tólem 111 fýntqa ($140) ósip, aı saıyn 9,25 fýntqa ($11,7) qymbattaıdy. Osylaısha, jyldyq tólem 1849 fýntqa ($2334) jetip, ótken jylǵy 1690 fýnttan ($2134) 9,4%-ǵa joǵary bolady.
Kóp energııa tutynatyn otbasylar odan da kóp tóleıtin bolady, sebebi belgilengen lımıt jalpy tólem somasyn emes, gaz ben elektr energııasynyń birlik qunynyń shekti mólsherin retteıdi.
Jańa tarıfter úsh aıǵa, ıaǵnı shildege deıin kúshinde bolady, sodan keıin qaıta qaralady. Baǵa ósimi shamamen 22 mıllıon otbasyǵa áser etedi, olar ózgermeli tarıfterdi paıdalanady. Al shamamen 11 mıllıon tutynýshy úshin bekitilgen tarıfter ózgerissiz qalady.
Sáýir aıyndaǵy tarıfterdiń qymbattaýy qatarynan úshinshi ret bolmaq. Sońǵy ret Ofgem qańtar aıynda shekti baǵany 1,2%-ǵa ósirip, ony 1738 fýntqa ($2194) jetkizgen bolatyn.
Elektr qýatynan bólek, basqa da kommýnaldyq qyzmetterdiń baǵasy ósedi. Sáýirden bastap sý qyzmetteri jylyna orta eseppen 100 fýnttan astamǵa qymbattaıdy. Sonymen qatar, jumys berýshilerdiń shyǵyndary da artady – ulttyq saqtandyrý jarnasy 13,8%-dan 15%-ǵa deıin kóteriledi.
Alaıda eń tómengi jalaqy 6,7%-ǵa ósip, saǵatyna 12,21 fýntqa ($15,4) jetedi. Bul 40 saǵattyq jumys aptasynda jumysshynyń aptalyq tabysy 488 fýntty ($616) quraıdy degen sóz.
Buǵan deıin habarlanǵandaı, Brıtanııadaǵy baılyqtyń teńsiz bólinýi týyndatqan áleýmettik-ekonomıkalyq teńsizdik «Memlekettik saıasatty zertteý ınstıtýty» (IPPR) júrgizgen zertteýge arqaý boldy.
Eske salsaq Ulybrıtanııa jasandy ıntellekt salasynda sýperderjava mártebesin alýdy maqsat etip otyr.