Ulybrıtanııada burynǵy hanzada Endrıý qamaýǵa alyndy

ASTANA. KAZINFORM — Ótken jyldyń qarasha aıyna deıin hanzada Endrıý tıtýlyn ıelengen Endrıý Maýntbatten-Vındzor Ulybrıtanııada qamaýǵa alyndy, dep habarlaıdy Kazinform-nyń Londondaǵy menshikti tilshisi. 

Temza alqaby polıtsııasynyń málimdemesinde 19 aqpanda Norfolk graftyǵynan kelgen 60 jas shamasyndaǵy er adamnyń tutqyndalǵany aıtylǵan. Ol qyzmet babyn teris paıdalandy degen kúdikke ilingen. Qazirgi ýaqytta ol qamaýda otyr. Berkshır men Norfolktaǵy mekenjaılarda da tintý jumystary júrgizilip jatyr. 

Ustalǵan adamnyń aty-jóni resmı túrde jarııalanǵan joq, alaıda brıtandyq BAQ https://www.bbc.com/ áńgime Ulybrıtanııa koroli III Charlzdyń aǵasy — Endrıý Maýntbatten-Vındzor týraly bolyp jatqanyn habarlap otyr.

Bas konstebldiń kómekshisi Olıver Raıttyń atap ótýinshe, tergeý alynǵan aqparatty muqııat baǵalaýdan keıin bastaldy. Ol quqyq qorǵaý organdary iske qoǵamdyq qyzyǵýshylyqtyń joǵary ekenin eskere otyryp, tergeýdiń obektıvtiligi men tutastyǵyn qamtamasyz etýge nıetti ekenin qosty.

Ulybrıtanııa zańyna sáıkes, qamaýǵa alý qylmys jasalǵan dep sanaýǵa negiz bolǵan jaǵdaıda, sondaı-aq naqty adamdy ustaý qajettiligi týyndaǵan jaǵdaıda múmkin. 

The Guardian gazetiniń habarlaýynsha, tergeý Maýntbetten-Vındzordyń balalarǵa jynystyq qylmys jasaǵany úshin sottalǵan amerıkalyq mıllıarder Djeffrı Epshteınge qupııa aqparatty berý múmkindigin tekserip jatyr. Bul Endrıý Ulybrıtanııanyń saýda ókili qyzmetin atqarǵan kezeńde bolýy múmkin dep shamalanyp otyr. 

Buǵan deıin Epshteın isi boıynsha jarııalanǵan sońǵy qujattarda Ilon Mask pen hanzada Endrıýdiń esimderi atalǵan edi. Keıinirek Endrıý hanzada marqum Elızaveta II patshaıym syılaǵan ataqtarynan óz erkimen bas tartatynyn málimdegen. Sońǵy kúnderi Ulybrıtanııa monarhy Charlz III de inisimen baılanysty daýǵa baılanysty jurt tarapynan syn men narazylyqqa ushyraǵan edi.

Sodan keıin Ulybrıtanııa koroli inisin barlyq ataǵy men rezıdentsııasynan aıyrǵan.