Ulybrıtanııada birneshe ondaǵan tutqyn qatelesip bosatylǵan
ASTANA. KAZINFORM — Ulybrıtanııa Batys Eýropadaǵy eń kóp tutqyn sany bar elderdiń kóshin bastap tur, dep habarlaıdy Kazinform agenttiginiń tilshisi.
Anglııa men Ýelstegi túrmelerde oryn tapshylyǵymen kúresý úshin Ulybrıtanııa úkimeti iske qosqan merziminen buryn bosatý baǵdarlamasy aıasynda shamamen 40-qa jýyq tutqyn qatelesip bosatylǵan.
Qyrkúıek aıynda osy jańa júıe boıynsha 1750-ge jýyq adam bostandyqqa shyqqan. Jańa erejege sáıkes, endi sottalǵandar jazasynyń burynǵy 50% emes, 40%-yn ótegennen keıin bosatylady. Bul ózgeris týraly úkimet 2025 jylǵy shilde aıynda habarlaǵan bolatyn.
Alaıda, baǵdarlamany júzege asyrý barysynda 37 tutqynnyń zańsyz túrde bosatylǵany anyqtaldy. Olardyń kópshiligi qaıtadan túrmege qaıtaryldy, biraq beseýi áli bostandyqta. Belgili bolǵandaı, qatelesip bosatylǵandardyń biri qaıtadan seksýaldyq sıpattaǵy qylmys jasap, qaıta ustalǵan.
World Prison Brief derekter bazasyna súıensek, ótken jyly Ulybrıtanııada 97 myńnan astam adam qamaýda otyrǵan. Bul kórsetkish Frantsııamen salystyrǵanda 22%-ǵa, Italııamen — 37%-ǵa, Germanııamen — 42%-ǵa, al Ispanııamen salystyrǵanda shamamen eki ese kóp.
Aldaǵy ýaqytta merziminen buryn bosatý baǵdarlamasy aıasynda taǵy birneshe myń tutqynnyń bostandyqqa shyǵýy josparlanyp otyr. Bul — apta saıyn standartty tártippen bosatylatyn 1 myń adamǵa qosymsha, dep habarlaıdy Sky News.
Aıta keteıik, Ulybrıtanııada qylmystyq-atqarý júıesin reformalaý júrip jatyr. Reformanyń maqsaty — qysqa merzimdi jazaǵa kesilgender sanyn azaıtý jáne bostandyqta júrgen sottalǵandarǵa qatysty baqylaýdy kúsheıtý.
Bul ózgerister túrmelerdegi oryn tapshylyǵynyń ýshyǵýyna jaýap retinde qolǵa alynǵan. Qazir jańa túrmeler salynyp jatyr, nátıjesinde qosymsha 14 myń oryn qurylmaq, onyń 2,5 myńy qazirdiń ózinde paıdalanýǵa berilgen. Alaıda, ınfraqurylymdy kóbeıtý jetkiliksiz, sondyqtan bılik reforma júrgizilmese, el túrme daǵdarysyna, sot protsesteriniń keshigýine jáne polıtsııanyń qamaýǵa alýdan bas tartýyna tap bolýy múmkin dep alańdaýly.
Budan buryn Ulybrıtanııada elektrondy jeke kýálik engiziletini aıtyldy.