Ulybrıtanııada bıyl jazda aptap ystyqtan tarıhı rekord tirkeldi
ASTANA. KAZINFORM – Ulybrıtanııada 2026 jyldyń jazyndaǵy ortasha temperatýra tarıhı kórsetkishten asyp tústi. Bul týraly Kazinform agenttiginiń menshikti tilshisi habarlaıdy.
Ulybrıtanııa meteorologııalyq qyzmetiniń dereginshe, bıyl elde ortasha temperatýra meteobaqylaý júrgizile bastaǵan 1884 jyldan bergi eń joǵary kórsetkishti kórsetip, 16,5 °C-qa jetti. Buǵan deıingi rekord 2025 jyly tirkelgen, sol jyly jazdaǵy ortasha temperatýra 16,1 °C boldy.
– Osy jazdaǵy aptap ystyqtan Ulybrıtanııada klımattyq rekord taǵy da jańardy. Mundaı rekordtar qazir burynǵydan da jıi tirkelip jatyr. Bul Ulybrıtanııadaǵy temperatýranyń ózgerýine antropogendik klımat ózgerisiniń áseri kúsheıip kele jatqanyn kórsetedi, – dedi Meteorologııalyq qyzmettiń Ulttyq klımattyq aqparat ortalyǵynyń basshysy, doktor Emı Doertı.
Jaz maýsymyndaǵy eń joǵary temperatýra 13 tamyzda Londonda tirkelip, 38,1 °C-qa jetti. Anglııa, Ýels jáne Soltústik Irlandııa aýmaǵyndaǵy meteostantsııalar ortasha temperatýranyń rekordtyq kórsetkishke jetkenin anyqtady. Shotlandııada bıyl meteobaqylaý tarıhynda altynshy márte jaz mezgili óte jyly boldy.
Sonymen qatar bıylǵy jazda kóbine kún bultsyz boldy. Elde 621,9 saǵat aspan ashyq bolǵan, bul – meteobaqylaý tarıhyndaǵy altynshy úzdik kórsetkish. Al Anglııa men Ýelste osy jaz kún shýaǵy mol túsken jaz maýsymdary arasynda ekinshi orynǵa jaıǵasty.
Bolashaqta Ulybrıtanııada jazǵy temperatýra qandaı bolady
Ulybrıtanııa Meteorologııalyq qyzmetiniń ǵalymdary eki iri kompıýterlik modeldeý nátıjesin salystyrdy (birinde parnıktik gazdar kontsentratsııasyna adam áreketiniń áseri eskerilse, ekinshisinde eskerilmegen). Ǵalymdar klımattyń ózgerýine baılanysty 2026 jyldaǵydaı jazdyń qaıtalaný yqtımaldylyǵy shamamen 130 ese artty degen qorytyndyǵa keldi.
– Eger klımatqa parnıktik gazdar shyǵaryndylary áser etpegende, mundaı jaz myń jylda shamamen bir ret qana qaıtalanýy múmkin edi. Al kómir jaǵýdyń áserinen ózgerip jatqan qazirgi klımatta mundaı qubylys shamamen toǵyz jylda bir ret qaıtalanady, – dep atap ótti Meteorologııalyq qyzmettiń klımattyq qubylystardy atrıbýtsııalaý baǵytynyń jetekshisi, doktor Mark Makkartı.
Sarapshylar 2025 jyly aptap ystyq bolǵanyn, odan keıingi rekord kelesi, ıaǵnı 2026 jyly tirkelgenin atap ótti.
– Biz nebári bir jyl ishinde munyń naqty nátıjesin kórip otyrmyz. 2026 jylǵy jazdyń ortasha temperatýrasy 2025 jylmen salystyrǵanda, 0,40 °C-qa joǵary boldy. Bul maýsymdyq temperatýra úshin edáýir aıyrmashylyq, – dedi Mark Makkartı.
Meteorologııalyq qyzmettiń málimetinshe, jahandyq temperatýranyń kóterilýine baılanysty eldegi jylyný úrdisi aldaǵy ýaqytta da jalǵasady.
Mamandar kún raıynyń aptap ystyqqa ulasyp, qýańshylyqtyń kúsheıýi múmkin ekenin de boljap otyr.
– Bıylǵy jaz qurǵaqtyǵymen, ásirese shilde aıynda eldiń ońtústiginde bolǵan qýańshylyqpen este qaldy. Klımattyq boljamdarǵa qaraǵanda, bıylǵy jazdaǵy jaýyn-shashyn kórsetkishteri jahandyq temperatýra 3 °C-qa joǵarylaǵan jaǵdaıda Ulybrıtanııada kútiletin jazǵy kórsetkishterge óte jaqyn boldy, – dedi Meteorologııalyq qyzmettiń klımatology, doktor Djeıms Poýp.
Buǵan deıin Eýropada aptap ystyqqa baılanysty ólim-jitim óskeni týraly jazdyq.
Aqzat Jıenalına
