Ulybrıtanııada áıelderdiń túsik jasatqany úshin qylmystyq jaýapkershiligi alynyp tastaldy
ASTANA. KAZINFORM — Ulybrıtanııada endi áıelder júktiligin óz betinshe toqtatqany úshin, tipti júktiliktiń 24 aptasynan keıin de qylmystyq jaýapqa tartylmaıdy.
Ulybrıtanııada júktiligin óz betinshe toqtatqany úshin sottalǵan nemese osy áreketi úshin jaýapqa tartylǵan áıelderge avtomatty túrde keshirim jasaý týraly zańnamalyq ózgerister kúshine endi. Sondaı-aq olarǵa qatysty qamaýǵa alý derekteri, polıtsııa tergeýleri men qylmystyq ister týraly málimetter tıisti derekqorlardan óshiriledi. Bul týraly Ulybrıtanııanyń Ádilet mınıstrligi habarlady.
Jańa normalar elde buǵan deıin qabyldanǵan Qylmys jáne qoǵamdyq tártipti qorǵaý týraly zań aıasynda 16 qarashada kúshine endi. Ózgerister júktilikti dári-dármek arqyly toqtatýdyń elde belgilengen 24 aptalyq merziminen asyp ketken jaǵdaılaryna da qatysty.
Jańa erejeler boıynsha áıelderge birden keshirim jasalady. Ol úshin ótinish berýdiń nemese memlekettik organdarǵa júginýdiń qajeti joq. Polıtsııa men sottar tıisti derekterdi óz betinshe jańartady.
Bul rette reforma 1967 jylǵy túsik jasatý týraly zańnyń kúshin joımaıdy. Atalǵan zań júktilikti medıtsınalyq jolmen toqtatý qyzmetterine qol jetkizý tártibin retteýdi jalǵastyrady. Zań talaptaryn buzǵan medıtsına qyzmetkerleri men basqa da tulǵalarǵa qylmystyq jaýapkershilik saqtalady. Alaıda áıelder endi óz júktiligin toqtatýǵa baılanysty áreketteri úshin qylmystyq qýdalaýǵa ushyramaıdy.
Eske salaıyq, buǵan deıin AQSh Joǵarǵy Soty túsik jasatýǵa arnalǵan dárini poshta jáne dárihanalar arqyly alýǵa qaıta ruqsat bergenin habarlaǵan edik.