Ulybrıtanııada avtokólik urlyǵy 75%-ǵa artty
ASTANA. KAZINFORM – Ulybrıtanııada urlanǵan avtokólikterdiń bir bóligi Birikken Arab Ámirlikteri men Grýzııaǵa jóneltilip, sol jerlerden basqa elderge qaıta satylady, dep habarlaıdy Kazinform agenttiginiń tilshisi.
Sońǵy on jylda Ulybrıtanııada kólik urlyǵy 75%-ǵa ósip, jylyna shamamen 130 myń oqıǵaǵa jetken. Bul málimetter Qorǵanys salasyndaǵy Koroldik birikken zertteýler ınstıtýtynyń «Ulybrıtanııadaǵy uıymdasqan avtokólik urlyǵy: úrdister men syn-qaterler» atty baıandamasynda keltirilgen.
Urlyqtar tolqynynyń artynda joǵary tehnologııamen jabdyqtalǵan qylmystyq sındıkattar tur. Olar zamanaýı tsıfrlyq quraldardy paıdalanyp, shynaıyǵa óte uqsas qujattardy qoldan jasaıdy, kólikterdiń sáıkestendirý nómirlerin ózgertedi, shetelge kólik tasymaldaýdyń tıimdi halyqaralyq syzbalaryn qoldanady jáne bul rette brıtandyq quqyq qorǵaý organdarynyń álsiz ári úılestirilmegen áreketterin tıimdi paıdalanady.
— Avtokólik urlyǵy endi usaq, kezdeısoq qylmys emes. Bul — ishki jáne halyqaralyq aspektileri bar, tabysy joǵary, táýekeli tómen, uıymdasqan aýyr qylmystyń bir túri, — dep jazady zertteý avtorlary.
Ulybrıtanııanyń bedeldi saraptamalyq ortalyǵy daıyndaǵan esepte kólik urlyǵy el ekonomıkasyna jyl saıyn shamamen 2,3 mıllıard dollar shyǵyn keltiretini jáne bul jaǵdaı 2021 jyldan beri avtosaqtandyrý syıaqysynyń 82%-ǵa ósýine sebep bolǵany aıtylǵan.
Qujatta Ulybrıtanııa porttarynan Birikken Arab Ámirlikteri, Grýzııa, Kıpr jáne Kongo Demokratııalyq Respýblıkasy sııaqty elderge úzdiksiz avtokólik aǵymy júrip jatqany sıpattalady. Bul elderden kólikter kórshiles memleketterge satylady. Urlyqtan bastap shetelge jóneltýge deıingi búkil protsess keıde bir táýlikten az ýaqytty alady.
Quqyq qorǵaý júıesiniń jaýaby álsiz ári retsiz bolyp otyr, bul statıstıkadan kórinedi: 2024 jyly avtokólik urlyǵyna qatysty aıyp taǵylǵan isterdiń úlesi nebári 2,6% ǵana boldy. Bul kórsetkish on jyl buryn 9,2% bolatyn.
Mundaı quldyraýdyń basty sebepteriniń biri — kadr tapshylyǵy, onyń saldarynan mamandandyrylǵan bólimshelerdiń jumysy álsirep otyr. Mysaly, Londonda buryn avtokólik qylmystaryn tergeýmen aınalysqan bólimshe ondaǵan qyzmetkerden birneshe ofıtserge deıin qysqarǵan.
Buǵan deıin Ulybrıtanııada dúken tonaýmen aınalysatyn uıymdasqan qylmystyq toptardyń áreketi 2024 jyly bólshek saýda sektoryna 2,8 mıllıard dollar shyǵyn keltirgeni habarlanǵan bolatyn.
Aıta keteıik, Ulybrıtanııanyń syrtqy ister mınıstri Devıd Lammı Tegerandy Ormýz buǵazy máselesi boıynsha kelissózder ústeline qaıta oralýǵa shaqyrǵan edi.