Ulybrıtanııada aptap ystyq saldarynan azyq-túlik tapshylyǵy týyndaýy múmkin
ASTANA. KAZINFORM — Ulybrıtanııada qalyptan tys ystyq aýa raıynyń saldarynan azyq-túlik tapshylyǵy qaýpi kúsheıip keledi. Bul týraly The Mirror basylymy Ulttyq fermerler odaǵyna (NFU) silteme jasap, BELTA jazdy.
Eldiń birqatar óńirinde bir aıdan astam ýaqyt boıy jańbyr jaýmaǵan. Sonyń saldarynan aýyl sharýashylyǵy daqyldarynyń, ásirese bıdaıdyń ósýi baıaýlaǵan. Jergilikti turǵyndardyń aıtýynsha, bıdaı alqaptaryndaǵy ósimdiktiń bıiktigi osy kezeńge tán qalypty deńgeıdiń nebári jartysyna ǵana jetken.
Anglııada shilde aıynda nebári 5,6 mıllımetr jaýyn-shashyn túsken. Bul 1911 jyly tirkelgen 13,4 mıllımetrlik eń tómengi rekordtyq kórsetkishten de eki eseden az.
Qazir fermerler eginniń kem degende bir bóligin saqtap qalýǵa kúsh salyp jatyr. Ulttyq fermerler odaǵynyń prezıdenti Tom Bredshoý bılikti shuǵyl sharalar qabyldaýǵa shaqyryp, fermerlerge sý qoımalaryn salýǵa múmkindik berý úshin salyqtyq jeńildikter qarastyrýdy usyndy.
— Biz azyq-túlikpen qamtamasyz etýdi tym uzaq ýaqyt boıy qalypty jaǵdaı retinde qabyldap keldik. Endi elde azyq-túlik tapshylyǵynyń týyndaýyna qatysty alańdaýshylyq kúsheıip otyr, — dedi Tom Bredshoý.
Aptap ystyq sút óndirisimen aınalysatyn sharýashylyqtarǵa da keri áserin tıgizip otyr. Dorset óńiriniń fermeri Sofı Gregorıdiń aıtýynsha, maýsym aıynda tirkelgen rekordtyq joǵary temperatýra kezinde sıyrlardy ystyqtan qorǵaý úlken qıyndyq týdyrǵan. Ystyq aýa raıynda maldyń azyq tutynýy azaıyp, sonyń saldarynan sút ónimdiligi de tómendeıdi.
Onyń aıtýynsha, klımattyń ózgerýi aýyl sharýashylyǵymen aınalysýdy jyldan-jylǵa kúrdelendirip barady.
Buǵan deıin Germanııa aptap ystyqqa baılanysty sýdy únemdeı bastaǵanyn jazdyq.
