Ulybrıtanııada 2008 jyldan keıin týǵan azamattarǵa temeki satyp alýǵa tyıym salynady
ASTANA. KAZINFORM — Ulybrıtanııada qabyldanatyn jańa zań temekisiz qoǵam qalyptastyrýǵa baǵyttalǵan, dep habarlaıdy Kazinform agenttiginiń menshikti tilshisi.
Temeki men veıp týraly zań jobasy dúısenbi kúni parlamenttegi sońǵy kezeńnen ótti. Lordtar palatasy 2024 jyldan beri ázirlenip kele jatqan qujatqa engizilgen azdaǵan túzetýlerdi maquldady.
Jańa bastamaǵa sáıkes, 2027 jylǵy 1 qańtarǵa deıin 18 jasqa tolmaıtyn azamattar endi eshqashan temeki men basqa da temeki ónimderin zańdy túrde satyp ala almaıdy. Endi temeki satyp alýǵa ruqsat etiletin eń tómengi jas jyl saıyn bir jasqa ulǵaıyp otyrady. Bul is júzinde 2009 jylǵy 1 qańtardan keıin týǵandardyń barlyǵyna ómir boıy tyıym engiziletinin bildiredi.
Sonymen qatar veıp qoldanýǵa qatysty shekteý de keńeıtiledi. Endi kámeletke tolmaǵan jolaýshylar otyrǵan kólikterde, balalar alańdarynda, mektepterdiń mańynda jáne aýrýhanalarda veıp paıdalanýǵa tyıym salynady. Qazirgi temeki shegýge tyıym salynǵan oryndardyń basym bóligi veıpten de azat aımaqqa aınalady.
Alaıda bul shekteý meıramhanalar men pabtardyń ashyq alańdaryna, sondaı-aq jaǵajaılar men jeke aýmaqtar sııaqty keń ashyq keńistikterge qoldanylmaıdy. Turǵyn úılerde temeki ónimderi men veıp qoldanýǵa ruqsat saqtalady.
Zańǵa koroldik maquldaý berilgennen keıin brıtan mınıstrleri temeki, nıkotın ónimderi men veıpterdi retteý boıynsha qosymsha ókilettikterge ıe bolady.
Bul bastama eldegi aldyn alýǵa bolatyn ólim-jitimniń, múgedektiktiń jáne densaýlyqtyń nasharlaýynyń basty sebepteriniń biri sanalatyn temeki shegýdiń zııanyn azaıtýǵa baǵyttalǵan keshendi saıasattyń bir bóligi.
Koroldik maquldaý — zań shyǵarý protsesiniń sońǵy kezeńi. Ol Ulybrıtanııa koroli qol qoıatyn rásim retinde júzege asady jáne elde kóbine formaldy sıpatqa ıe.
Qazirgi ýaqytta bolashaq urpaqtyń temeki ónimderine qoljetimdiligin shekteýge baǵyttalǵan bastamalar sanaýly elderde ǵana júzege asyrylyp jatyr. Mysaly, Maldıv araldarynda 2007 jylǵy 1 qańtardan keıin týǵandardyń bárine, sonyń ishinde týrısterge de, temeki shegýge jáne temeki satýǵa tyıym salynǵan.
Mundaı tásildi alǵash engizgen el Jańa Zelandııa bolǵan. Alaıda 2023 jyly úkimet aýysqannan keıin bul zań tolyq kúshine enbeı jatyp-aq joıyldy.
Buǵan deıin Aqmaral Álnazarova qoǵamdyq oryndarda kalıan shegýge qoıylǵan tyıymdy jumsartý múmkindigine qatysty pikir bildirgen edi.
Aıta ketelik Túrkııa temeki shegýge tyıymdy kúsheıtken edi.
