Ulybrıtanııa jumyssyzdarǵa salmaq joǵaltýǵa arnalǵan ınektsııa usyndy

ASTANA. KAZINFORM — Ulybrıtanııanyń Densaýlyq saqtaý mınıstrligi «semizdik» dıagnozy qoıylǵan jumyssyz adamdarǵa aryqtaý ınektsııalary usynylatyn josparyn jarııa etti, dep habarlaıdy Euronews. 

Áńgime denedegi artyq maıǵa qarsy dári-dármek shyǵaratyn álemdegi eń iri óndirýshilerdiń biri Lilly kompanııasynyń 280 mln fýnt sterlıng (336 mln eýro) kólemindegi ınvestıtsııasy týraly bolyp otyr.

Óz kezeginde Densaýlyq saqtaý mınıstri Ýes Strıtıng jańa dári-dármek klasy semizdik máselesine «orasan» áser etip, Ulybrıtanııany jumysqa tarta alatynyna senimdi. 

«Adamdardyń tolýy densaýlyq saqtaý qyzmetimizge aýyr salmaq túsiredi. Bul NHS-qa jylyna 11 mlrd fýnt sterlıngke (13 mlrd eýro) deıin shyǵyn ákeledi. Bul temeki shegýden keletin shyǵynnan da kóp. Al bul ekonomıkamyzdy tejep otyr. Semizdikten týyndaıtyn aýrýlar adamdardy aýrýyna baılanysty jylyna orta eseppen tórt qosymsha demalys alýǵa májbúr etedi, al kópshiligi múlde jumys istemeýge májbúr», — dep atap ótti Ulybrıtanııa Densaýlyq saqtaý mınıstrliginiń basshysy Ýes Strıtıng.

Ulybrıtanııa úkimeti ókiliniń aıtýynsha, semizdik — adamdardyń densaýlyǵynyń nasharlap, tolyq jumys isteýine kedergi keltiretin negizgi faktorlardyń biri. 

Sandarǵa sáıkes, semizdik qazirgi ýaqytta el ekonomıkasyna jyl saıyn 3,2 mlrd fýnt sterlıng (3,8 mlrd eýro) shyǵyn ákeletinin kórsetedi. Onyń jartysyna jýyǵy eńbek ónimdiligin joǵaltýdan týyndaıdy.

Buǵan deıin Atyraý oblysynda byltyr 140 balaǵa semizdik dıagnozy qoıylǵany anyqtaldy.

Sondaı-aq, COVID-19 saldarynan semizdikke shaldyqqan balalar sany artqany habarlandy.