Ulybrıtanııa JI sýperkompıýterin jasaýǵa mıllıard dollar bóledi
ASTANA. KAZINFORM — Ulybrıtanııa jasandy ıntellektige (AI) arnalǵan sýperkompıýter jasaýǵa 750 mıllıon fýnt sterlıng (1 mıllıard dollar) bóledi, dep habarlaıdy TASS.
— 2030 jyly paıdalanýǵa berilgennen keıin bul júıe álemdegi eń ozyq keshenderdiń birine aınalady. Ol synalǵan ári bolashaǵy zor protsessorlardy jáne eń jańa mıkrochıpterdi biriktirip, kúrdeli mindetterdi dástúrli sýperkompıýterlerge qaraǵanda áldeqaıda tıimdi oryndaýǵa múmkindik beredi, — delingen málimdemede.
Bólinetin qarajattyń jartysynan astamy — 400 mln fýnt sterlıng — jasandy ıntellekt sýperkompıýterin kelesi býyn chıpterimen jabdyqtaýǵa jumsalady. Alǵashqy 150 mln fýnt osy jazda bólinedi.
Asa qýatty esepteý júıesin qurýǵa arnalǵan tender jaqyn ýaqytta jarııalanady. Sýperkompıýter The University of Edinburgh bazasynda qurylyp jatqan ortalyqta ornalastyrylyp, Ulybrıtanııanyń jasandy ıntellektini damytý jobasynyń biryńǵaı júıesine qosylady. Onyń quramyna sondaı-aq Isambard-AI, DAWN jáne Zenith esepteý ortalyqtary kiredi.
Sonymen qatar jańa júıede Ulybrıtanııada ázirlengen chıpterge basymdyq beriledi. Vedomstvonyń málimetinshe, bul joba eldegi zertteýshilerge, startaptarǵa jáne memlekettik qyzmetterge jasandy ıntellektini ázirleý men qaýipsiz qoldanýǵa qajetti joǵary ónimdi esepteý qýattaryna qoljetimdilik berý maqsatynda júzege asyrylyp jatyr.
Aıta keteıik, Ispanııa men Eýroodaq 10 mln eýro turatyn kvanttyq sýperkompıýterdi iske qosty.
