Ulybrıtanııa jaǵalaýynda munaı tankeri men júk kemesi soqtyǵysty

ASTANA. KAZINFORM – Shyǵys Iorkshır jaǵalaýynda, Hall qalasyna jaqyn jerde eki keme soqtyǵysty. Onyń biri júk kemesi, ekinshisi munaı tankeri, dep habarlaıdy Kazinform BBC aqparat agenttigine silteme jasap. 

Soqtyǵys saldarynan eki kemede de órt shyqty. Adamdar evakýatsııalanyp jatyr. London ýaqyty boıynsha 13:39-daǵy (Astana ýaqyty boıynsha 18:39) jaǵdaı boıynsha 32 adam jaǵaǵa shyǵaryldy. Ázirge olardyń jaǵdaıy belgisiz. 

Ulybrıtanııa jaǵalaý kúzeti qyzmetiniń habarlaýynsha, dabyl jergilikti ýaqyt boıynsha tańǵy saǵat 9:48-de (Astana ýaqyty boıynsha 14:48) kóterilgen. BBC aqparat kózderiniń habarlaýynsha, munaı tankeri órtenip ketken, keıin ekinshi kemedegi órt týraly aqparat paıda bolǵan. 

Soqtyǵysqan kemeler amerıkalyq Stena Immaculate tankeri men Portýgalııa jalaýy ilingen Solong konteınerlik kemesi bolýy múmkin. 

Teńizdegi kólik qozǵalysyn qadaǵalaıtyn MarineTraffic veb-saıtynyń habarlaýynsha, Gretsııanyń Agııa Teodorı portynan shyqqan Stena Immaculate saǵat 09:48-de Hall qalasynyń mańynda zákir qaldy. Osy kezde Shotlandııanyń Grenjmýt portynan kele jatqan Solong oǵan jaqyndady. Soqtyǵys bolǵan kórinedi. 

Oqıǵa ornyna jaqyn mańdaǵy eldi mekenderden qutqarý tikushaǵy men qutqarý qaıyqtary, sondaı-aq jaǵalaý kúzetiniń ushaǵy jiberildi. Órtti sóndirýge arnalǵan jabdyqtary bar jaqyn mańdaǵy kemeler kómekke keledi. 

Teńizdegi qozǵalysty baqylaıtyn MarineTraffic veb-saıtyna qaraǵanda, jaqyn jerde taǵy birneshe keme bar. 

Buǵan deıin Germanııada 300 jolaýshysy bar júrdek poıyz júk kóligimen soqtyǵysqanyn jazǵan edik.