Ulybrıtanııa Visa men Mastercard-qa balama tólem júıesin ázirlep jatyr
ASTANA. KAZINFORM — London Vashıngton tarapynan bolýy múmkin qysym aıasynda balama ulttyq tólem júıesin ázirleý jumysyn jedeldetti, dep habarlaıdy Kazinform agenttiginiń menshikti tilshisi.
Osy aptada Ulybrıtanııanyń iri bankteriniń basshylary amerıkalyq Visa jáne Mastercard júıelerine balama bolatyn ulttyq tólem júıesin qurý máselesi boıynsha alǵashqy kezdesýin ótkizbek.
Bul bastama Londonnyń AQSh prezıdenti Donald Trump qarjy ınfraqurylymyn Eýropaǵa qysym jasaý quraly retinde paıdalanýy múmkin degen alańdaýshylyǵynan týyndap otyr.
The Guardian basylymynyń jazýynsha, kelissóz ústeline alǵash ret Barclays, NatWest, Lloyds, Santander jáne Nationwide Building Society ókilderi jınalady. Jıynǵa Barclays basshysy Vim Maru tóraǵalyq etedi. Salaaralyq úılestirýdi UK Finance qaýymdastyǵy qamtamasyz etedi, dep jazady The Telegraph.
Kezdesýde jańa zańdy qurylym — DeliveryCo kompanııasyn qurý máselesi talqylanady. Ol bolashaqta Visa men Mastercard-qa básekeles júıeni iske qosý úshin quqyqtyq rásimderdi ázirleýge, basqarý modelin qalyptastyrýǵa jáne qarjylandyrý tartýǵa jaýapty bolady.
Ótken jyldyń naýryz aıynda retteýshi organ — Payment Systems Regulator eldegi kartochkalyq tranzaktsııalardyń 95 paıyzdan astamy Mastercard pen Visa arqyly júzege asatynyn málimdegen edi.
Qolma-qol aqshany paıdalaný kúrt azaıǵan jaǵdaıda bul ústemdik erekshe sezilip otyr. Qazir Ulybrıtanııada quny 1 myń fýnttan asatyn qyzmet úshin qolma-qol aqsha qabyldaıtyn satýshyny tabý barǵan saıyn qıyndap keledi.
— Eger Mastercard pen Visa ajyratylsa, biz 1950-jyldarǵa qaıta oralar edik. Sondyqtan bizge egemen tólem júıesi qajet, — dedi jobaǵa qatysy bar basshylardyń biri The Guardian basylymyna bergen suhbatynda.
Onyń aıtýynsha, bul — bank kartalary ekonomıkada ústemdik qurmaǵan, bıznes tolyqtaı qolma-qol aqshaǵa táýeldi bolǵan kezeńdi meńzeıdi.
Mysal retinde Reseı keltiriledi. AQSh sanktsııalary engizilgennen keıin Visa men Mastercard el ishindegi operatsııalarǵa qyzmet kórsetýdi toqtatyp, halyqtyń bir bóligi ádettegi tólem tásilderin ýaqytsha paıdalana almaı qalǵan.
Resmı London bul bastamanyń negizgi maqsaty — júıeniń turaqtylyǵyn arttyrý, kıberqaýipterden qorǵaný jáne aqaýlar týyndaǵan jaǵdaıda rezervtik arna qalyptastyrý ekenin atap ótedi. Alaıda ony AQSh tarapynan bolýy múmkin qaýiptermen tikeleı baılanystyrýdan ázirge tartynyp otyr.
Ótken jyly Ulybrıtanııa Qarjy mınıstrligi bólshek tólemderge arnalǵan jańa býyn ınfraqurylymyn qurý josparyn tanystyrsa, Bank of England ony ázirleý úshin arnaıy jumys tobyn qurǵan. Jańa júıe 2030 jylǵa qaraı iske qosylýy múmkin.
Eske sala keteıik, buǵan deıin Brıtanııa mindetti tsıfrlyq jeke kýálikten bas tartqan edi.