Ulybrıtanııa túrmelerinde bos oryn qalmady
ULYBRITANIıA. KAZINFORM – Ulybrıtanııada jaqynda bılikke kelgen oppozıtsııanyń taǵy berekesi qashty. Jańa úkimet sottalǵandardy qaıda jibererin bilmeı dal, dep habarlaıdy Kazinform tilshisi.
Sanaýly kúnderden keıin túrmelerde bos oryn qalmaıyn dep tur. ıAǵnı, polıtsııadan bastap, sotqa deıingi qylmysqa qarsy kúres mashınasynyń isten shyǵýy múmkin. Sondyqtan Leıborıster qylmyskerlerdi kúzden bastap, bostandyqqa jiberýdi josparlap otyr. Basqa amal joq.
Ulybrıtanııanyń jańa úkimeti taǵy bir kúrdeli synaqtan ótýge bilek sybana kiristi. Bıliktegiler qyrkúıek aıynan bastap jazasyn óteýshilerdi merziminen buryn bosatý tájirıbesin keńeıtýdi josparlap otyr. Ádilet mınıstri Shabana Mahmýdtyń aıtýynsha, tyǵyryqtan shyǵarar basqa jol joq.
«Túrmelerimizdiń túgi qalmady. Aıtar sózim joq. Eń soraqysy, burynǵy úkimet bul týraly bildi. Qazir er kisilerge arnalǵan abaqtylar 99 paıyzǵa deıin tolǵan. Bul kórsetkish shamamen sońǵy 18 aı boıy osy deńgeıde saqtalyp tur», - deıdi Ulybrıtanııa Ádilet mınıstri Shabana Mahmýd.
Úkimettiń keıingi málimetterine sáıkes, qazir sottalǵandardyń sany 90 myńǵa jýyq jáne birneshe apta ishinde túrmeler túgel tolyp ketýi múmkin. Odan keıin polıtsııa bólimshelerindegi ýaqytsha ustaý abaqtylaryn paıdalaný qajet bolady. Nátıjesinde tártip saqshylaryna kóshelerdi patrýldeý qıynǵa túspek.
«Úkimettiń zańǵa ýaqytsha ózgeris engizýden basqa amaly joq ekenin málimdeımin. Jeńil jaza túrlerin óteýshiler túrmeden erterek shyǵarylady. Shartty túrde merziminen buryn bosatýdyń eń tómengi shegi ótelgen merzimniń 50 paıyzynan 40 paıyzyna deıin qysqarady», - deıdi Ulybrıtanııa Ádilet mınıstri Shabana Mahmýd.
Jańa ishki ister mınıstri de kúrmeýi kóp máseleni mura retinde qaldyryp ketken konservatorlardy aıyptady. Qazir 6 jańa túrmeniń qurylysy júrip jatyr. Qosymsha 20 myń oryndyq abaqty salý josparlanǵan. Óıtkeni úkimet 20 myń polıtseıdi jumysqa alýǵa bekinip otyr.
«Konservatorlar sońǵy aılarda ǵana emes, biraz jyl qatarynan jaýapkershilikten jurdaı bolǵan. Túrmelerdiń shamadan tys tolyp ketý máselesin tez arada sheshý múmkin bolmaıyn dep tur», - deıdi Ulybrıtanııa Іshki ister mınıstri Ivett Kýper.
Jańa úkimetke mundaı qadamǵa barý ońaı bolmady. Jospardyń qaýipti ekenin olar tolyq túsinedi. Biraq aýrýyn jasyrǵan óledi, deıdi leıborıster. Barlyǵy 5 500-ge jýyq adam bostandyqqa jiberilmek. Qoǵam belsendileri de bılik partııasynyń bul sheshimin qoldap otyr.
«Bul durys sheshim. Óıtkeni biz biraz ýaqyttan beri daǵdarystamyz. Jáne odan shyǵý úshin esh áreket jasalmaǵany qynjyltady», - dedi Túrmelerdi basqarýshylar qaýymdastyǵynyń prezıdenti Tom Ýıtlı.
Biraq bir jarym jyldan keıin qaıta qaralatyn jańa josparmen múldem kelispeıtinder de bar. Bostandyqqa shyqqandar qaıta qylmys jasasa nemese bosatý sharttaryn buzsa, túrmege qaıta toǵytylýy múmkin. Biraq oǵan qaramastan qylmyskerlerdiń qurbandary ózderin jaısyz sezinetinderin aıtady.
«Qylmyskerler túrmeden erte shyǵarylsa, olardan qorlyq kórgenderdiń záresi ushady. Alańdaýshylyǵy artyp, ishki jaralary qoza túsedi», - dedi Londondaǵy jábirlenýshilerdiń quqyǵyn qorǵaý boıynsha komıssar Kler Vaksman.
Ulybrıtanııa jazasyn óteýshilerdiń sany boıynsha Batys Eýropada kósh bastap tur. Pandemııadan keıin olardyń sany tipti artqan. Óıtkeni sot otyrystarynyń keshigýi jıilep, qamaýda ustaý merzimi uzarǵan. Sondaı-aq aýyr qylmys jasaǵandarǵa jazasynyń kem degende 65 paıyzyn óteý talaby kúsheıgen. Sarapshylar da, bılik ókilderi de quqyq buzýshylyqtyń aldyn alý sharalaryn kúsheıtýdi jáne túrmege toǵytýdyń ornyna balama retinde shartty jazalar engizip, májbúrleý jumystaryn qoldaný tájirıbesin keńeıtýdi usynyp otyr.
