Ulybrıtanııa týrıstik salyq engizýi múmkin

ASTANA. KAZINFORM — Brıtandyq merlerge týrıstik salyq engizý quqyǵy berilýi múmkin, dep habarlaıdy Kazinform agenttiginiń menshikti tilshisi.

Ulybrıtanııa úkimeti Anglııa merlerine qonaqúılerde, hostelderde jáne ózge de ornalastyrý oryndarynda túneıtin týrısterden alym alýǵa múmkindik beretin ókilettik berýdi kózdep otyr.

Jınalǵan qarajat qoǵamdyq kólikti damytýǵa, ınfraqurylymdy jańǵyrtýǵa jáne týrızm sektoryn qoldaýǵa baǵyttalmaq. Bul bastamany London meri Sadık Han jáne Manchester meri Endı Bernhem belsendi túrde qoldap keledi.

Mundaı salyq túrin engizý arqyly Brıtanııa kelesi jyly Shotlandııa men Ýelstiń tájirıbesin engizbek. Mundaı praktıka Nıý-Iork, Parıj jáne Mılan qalalarynda burynnan qoldanylyp keledi.

Ótken jyly sheteldik týrıster Ulybrıtanııaǵa shamamen 42,6 mln sapar jasap, 293 mln-nan astam tún ótkizgen jáne jalpy 32,5 mlrd fýnt shyǵyndanǵan.

Jańa salyq 2028 jylǵy Eýropa fýtbol chempıonatyna daıyndyqty jaqsartýǵa, sondaı-aq eń júktemesi joǵary jáne tanymal qalalyq aımaqtardyń jaǵdaıyn kóterýge kómektesedi dep boljanǵan.

Bıznes, jergilikti qoǵamdastyqtar jáne ózge de múddeli taraptar jańa alym tetigi boıynsha óz pikirlerin 12 aptalyq qoǵamdyq talqylaý barysynda bildire alady.

Bul shara sondaı-aq 2023 jyly óz mindettemelerin oryndaı almaı, is júzinde bankrottyq jarııalaýǵa májbúr bolǵan Bırmıngem qalasyndaǵy jaǵdaıdyń qaıtalaný qaýpin azaıtýy múmkin.