Ulybrıtanııa temeki satyp alýǵa birtindep tyıym salady

Brıtan úkimeti shylymqorlyqpen bilek sybana kúrespek. Qazir elde temeki tek 18 jastan asqandarǵa ǵana satylady. Bolashaqta bul jas jyl saıyn joǵarylaı bermek. Nátıjesinde birshama ýaqyt ótken soń shylym ataýly eshkimge satylmaıdy, deıdi Kazinform tilshisi.

Ulybrıtanııa úkimetiniń málimeti boıynsha, 5 shylymqordyń 4-eýi birinshi ret 20 jasynda temeki shege bastaıdy eken. Olardyń nıkotınge táýeldiligi ómiriniń sońyna deıin jalǵasady.

Shylymqorlyqtyń saldarynan Tumandy Albıonda jyl saıyn shamamen 64 myń adam qaıtys bolady.

Temeki shegemin dep aýrý tilep alatyn 75 myńdaı azamat aı saıyn dárigerge qaralady.

Zııan ádettiń el ekonomıkasyna tıgizer zardaby da orasan: jumyssyzdyq, merziminen buryn qaıtys bolý jáne Ulttyq densaýlyq saqtaý qyzmetine salmaq túsirýdiń nátıjesinde jyl saıyn 17 mlrd sterlıng fýnt kóleminde shyǵyn keledi.

«Men bolashaqta temeki shegý jasyn jyl saıyn bir jylǵa kóterýdi usynamyn. Bul búgingi on tórt jasar jasóspirimge bolashaqta eshqashan zańdy túrde temeki satylmaıdy degen sóz. Olar jáne olardyń urpaqtary temeki shekpeı ósedi», — deıdi Ulybrıtanııa Premer-mınıstri Rıshı Sýnak.

Úkimet jańa zań jobasynyń shylym shegýshilerdi qylmyskerlermen teńestirmeıtinin atap ótti. Qazir temeki satyp alyp júrgen kez-kelgen adamnyń bolashaqta da quqyǵy shektelmeıdi dedi bıliktegiler.

Budan bólek elektrondy temekiniń balalarǵa satylmaýy da qatań qadaǵalanbaq. Óıtkeni árbir besinshi balanyń veıptiń dámin kórgeni belgili bolyp otyr.

«Árdaıym bala kútýshi memleket kebin kııý — konservatorlardyń maqsaty emes. Bári de kerisinshe. Bul qoǵam ıgiligi úshin jasalyp otyr dep aıtatyndaı jaǵdaı shyǵar. Zııan ádetin qoıa almaı júrgen qazirgi shylymqorlardan bastap bul bastamany qoldaıdy dep oılaımyn», — deıdi saıasatker Djennıfer Djonson.

Jańa saıasattyń nátıjesinde jastar 2040-shy jylǵa qaraı tolyǵymen temekiden bas tartpaq.

Biraq Ulybrıtanııada temeki bıznesin dóńgeletip júrgen iri kompanııalardyń kiristen aıyrylatyny anyq. Óskeleń urpaqty bul zııandy ádetten ada etý bastamasyn halyq ta qoldap jatyr.

«Menińshe, osy tektes keıbir máseleler boıynsha baqylaýdy kúsheıtý kerek-aq. Shylym shegýdiń eshqandaı da paıdasy joq. Sondyqtan men tyıym salýdy tolyǵymen qoldaımyn», — deıdi kóshe júrginshisi.

«Jas ereksheligine baılanysty shekteý qoıyp, balalardy qadaǵalaý durys. Meniń 14 jasar ulym bar. Onyń temeki satyp alǵanyn qalamas edim», — deıdi taǵy bir brıtanııalyq.

Osyǵan uqsas zań jobasyn 2022 jyldyń jeltoqsanynda Jańa Zelandııa Parlamenti maquldady.

Ol elde 2009 jyldan keıin týǵan adamdarǵa temeki satylmaıdy. Danııa memleketi de osy baǵytta áreket etýdi josparlap otyr.