Ulybrıtanııa sottalǵandardy merziminen buryn bosatý baǵdarlamasyn ýaqytsha toqtatty
ASTANA. KAZINFORM – Ulybrıtanııanyń jańa premer-mınıstri Endı Bernem sottalǵandardy jaza merziminiń úshten birin ótegennen keıin merziminen buryn bosatýdy kózdeıtin baǵdarlamany ýaqytsha toqtatty, dep habarlaıdy VVS.
Baǵdarlamany burynǵy úkimet bıylǵy qyrkúıekte iske qosýdy josparlaǵan edi. Onyń maqsaty – túrmelerdegi oryn tapshylyǵyn azaıtý. Alaıda qoǵamda qaýipti qylmyskerlerdiń merziminen buryn bostandyqqa shyǵýy múmkin degen alańdaýshylyq týyndaǵan.
– Qoǵam qaýipsizdigi árdaıym men úshin basty orynda bolady. Baǵdarlama shuǵyl qaıta qaralyp, táýekelder tolyq baǵalanǵanǵa deıin eshkim osy tártippen bosatylmaıdy, – dedi Endı Bernem.
Burynǵy premer Kır Starmer úkimetiniń jospary boıynsha Anglııa men Ýelste keıbir sottalǵandardy merziminen buryn bosatý tártibi jeńildetilmek edi. Máselen, jaqsy tártibi úshin jazasynyń jartysyn ótegennen keıin bosatylatyndar úshten birin ótegen soń shyǵýǵa múmkindik alatyn. Al zorlyq-zombylyq qylmystary úshin sottalǵandar jazasynyń úshten ekisiniń ornyna jartysyn ótegennen keıin shartty túrde bosatyla alatyn edi. Baǵdarlama asa aýyr qylmys jasaǵandarǵa qoldanylmaıdy.
Ulybrıtanııa túrmelerinde qazir shamamen 100 myń adam otyr. Sonyń 87 myńy Anglııa men Ýelstegi túzeý mekemelerinde qamalǵan. Bılik bul baǵdarlamany túrmelerdiń shamadan tys tolýyn azaıtý úshin usynǵan.
Ádilet mınıstri Aleks Norrıstiń aıtýynsha, baǵdarlama kúshine ense, qyrkúıekte shamamen 700 adam, al jalpy sany 6 myńǵa jýyq sottalǵan merziminen buryn bosatylar edi.
Túrme qyzmetkerleri kásipodaǵynyń basshysy Stıv Gıllan úkimettiń sheshimin qoldap, qoǵam qaýipsizdigi men qylmys qurbandarynyń múddesin birinshi orynǵa qoıý durys ekenin aıtty. Al aty-jónin atamaǵan túrme qyzmetkeri bul sheshimdi synap, eger qyrkúıekte sottalǵandar bosatylmasa, qarasha aıynda túrmelerde bos oryn múlde qalmaýy múmkin ekenin eskertti.
Aıta keteıik, buǵan deıin Ulybrıtanııanyń jańa premer-mınıstri Endı Bernem úkimet quramyn jasaqtap jatqanyn jazdyq.
