Ulybrıtanııa Syrtqy ister mınıstri: Ormýz buǵazyn buǵattaý qatelik

ASTANA. KAZINFORM — Ulybrıtanııanyń syrtqy ister mınıstri Devıd Lammı Tegerandy Ormýz buǵazy máselesi boıynsha kelissózder ústeline qaıta oralýǵa shaqyrdy, dep habarlaıdy Anadoly. 

BBC Radio 4 arnasyndaǵy tańǵy «Today» baǵdarlamasynda sóılegen sózinde Lammı AQSh-tyń Irannyń ıadrolyq nysandaryna jasaǵan soqqylaryna qatysty pikir bildirdi.

Onyń aıtýynsha, Irannyń jaýap áreketi — aımaqtaǵy amerıkalyq bazalarǵa shabýyl jasaý nemese Ormýz buǵazyndaǵy mańyzdy kólik dálizin jabý «apattyq qatelik» bolmaq.

— Qazir AQSh-tyń aımaqtaǵy áskerı bazalaryna shabýyl jasaý orasan zor, orny tolmas qatelik. Bizdiń áskerıler de sol jerde ornalasqan. Bul apatqa ákelip soǵýy múmkin. Ormýz buǵazyn jabý da úlken qatelik, — dep atap ótti mınıstr.

Lammı Iran syrtqy ister mınıstri Abbas Erakchıge Iran basshylyǵyna ıadrolyq baǵdarlamasyna qatysty usynylǵan daǵdarystan shyǵý jolyna baıyppen qaraý jónindegi talapty jetkizýin ótingenin aıtty.

— Olar ózderine usynylǵan daǵdarystan shyǵý jolyna endi baıyppen qaraýy kerek, — dedi Lammı.

AQSh soqqylary Irannyń ıadrolyq baǵdarlamasyn birneshe jylǵa keıin shegerýi múmkin

Mınıstrdiń aıtýynsha, Batys odaqtastary AQSh soqqylarynyń saldaryn áli de zerttep jatyr, alaıda Iranda baıytylǵan ýran qory áli de qalýy múmkin degen boljam bar. Soǵan qaramastan, Lammıdiń baǵalaýynsha, AQSh-tyń áreketi Irannyń ıadrolyq baǵdarlamasyn «birneshe jylǵa artqa shegerýi» yqtımal.

Áýe soqqylarynyń quqyqtyq zańdylyǵyna qatysty suraqqa Lammı jaýap berýden bas tartyp, bul másele Vashıngtonnyń quzyrynda ekenin aıtty.

— Iran tarapynda deeskalatsııa jolyna túsý múmkindigi áli de bar, — dedi mınıstr.

Sondaı-aq ol ótken aptada Jenevada Iran men Eýropanyń «úshtigi» (Frantsııa, Germanııa, Ulybrıtanııa) arasynda ótken kelissózderdiń «óte kúrdeli» bolǵanyn eske saldy.

— Barlyǵy Tegerandy EO jáne AQSh-pen júrgiziletin kelissózderge baıyppen qaraýǵa shaqyryp otyr, — dep qorytyndylady Lammı.

Aıta ketelik iri munaı tankerleri Ormýz buǵazyn aınalyp ótý úshin baǵytyn ózgertip jatqany týraly jazǵan edik.