Ulybrıtanııa Syrtqy ister mınıstri Gaza sektory boıynsha kelissózder júrgizý úshin Saýd Arabııasyna keldi
Ulybrıtanııa Syrtqy ister mınıstri Djeıms Kleverlı Palestına-Izraıl janjalynyń órshýine jol bermeý maqsatynda Taıaý Shyǵys elderindegi áriptesterimen kelissózder júrgizý úshin Saýd Arabııasyna keldi, dep habarlaıdy Kazinform tilshisi.
«Djeıms Kleverlı senbi kúni Gaza sektoryndaǵy jaǵdaı boıynsha Arab Lıgasynyń tótenshe otyrysynyń aldynda Saýd Arabııasynda kezdesip jatqan Taıaý Shyǵys elderiniń syrtqy ister mınıstrlerimen kezdesedi», - dep habarlady Ulybrıtanııa Syrtqy ister mınıstrligi.
Djeıms Kleverlı onda Lıvan men Iemendi qosa alǵanda, aımaqtyq shıelenistiń aldyn alýǵa kúsh salý máselesin kótermekshi. Ol sondaı-aq Gaza sektoryndaǵy beıbit turǵyndarǵa gýmanıtarlyq kómek kólemin arttyrý jónindegi bastamalardy talqylaıdy.
«Ol Ulybrıtanııa kómek jetkizý jáne kepilge alynǵandardy, onyń ishinde brıtandyq azamattardy bosatý múmkindigin berý úshin soǵys qımyldaryna erterek gýmanıtarlyq úzilis engizýdi jaqtaıtynyn rastaıdy», - dedi Ulybrıtanııanyń syrtqy saıasat vedomstvosy.
«Áriptestik kezdesý barysynda brıtandyq syrtqy ister mınıstri Ulybrıtanııanyń qonys aýdarýshylar zorlyq-zombylyǵynyń artýyn aıyptaıtynyn rastap, Izraıldi Batys jaǵalaýdaǵy jaǵdaıdy jaqsartý úshin kinálilerdi jaýapqa tartýǵa shaqyrady. Ol Ulybrıtanııanyń eki memlekettiń qatar ómir súrýi negizinde ómirsheń sheshimge qol jetkizýge baǵyttalǵan dıplomatııalyq sheshimdi jandandyrýdy qoldaıtynyn málimdeıdi», - dep tolyqtyrdy Ulybrıtanııa SІM.
