Ulybrıtanııa Sırııanyń kúshtik qurylymdaryna salynǵan sanktsııalardy alyp tastady

ASTANA. KAZINFORM — Londonda bul qadam aımaqtaǵy turaqtylyqty nyǵaıtýǵa jáne «sırııalyq bosqyndardyń oralýyn yntalandyrýǵa» septigin tıgizedi dep málimdedi, dep habarlaıdy Kazinform tilshisi.

Beısenbi kúni Ulybrıtanııa Sırııa Qorǵanys jáne Іshki ister mınıstrlikterine, sondaı-aq birqatar barlaý qyzmetterine qatysty aktıvterdi buǵattaý sharalaryn alyp tastady. Bul sanktsııalar Bashar Asadtyń bıligi kezinde engizilgen bolatyn.

Ulybrıtanııa Qarjy mınıstrligi jarııalaǵan habarlamada Sırııanyń Іshki ister mınıstrligi, Qorǵanys mınıstrligi jáne Bas barlaý basqarmasy endi aktıvterdi buǵattaý tiziminen shyǵarylǵan 12 uıymnyń qataryna kiretini kórsetilgen.

Qara tizimnen shyǵarýdyń naqty sebepteri habarlamada kórsetilmegen.

Sondaı-aq sanktsııalar Sırııanyń memlekettik teleradıo kompanııasy - ORTAS pen taǵy birneshe BAQ-qa qatysty da alynyp tastalǵan.

— Bul sharalar Asad bıligi qulaǵannan keıin Sırııanyń ekonomıkalyq qalpyna kelýine qoldaý kórsetedi, — dedi beısenbi kúni Ulybrıtanııa premer-mınıstri Kıer Starmerdiń resmı ókili.

Onyń aıtýynsha, juma kúni kúshine enetin bul sheshimder «aımaqtaǵy turaqtylyqty qamtamasyz etýge jáne sırııalyq bosqyndardyń otanyna qaıtýyna yqpal etýge baǵyttalǵan».

Bıyl naýryz aıynda Ulybrıtanııa úkimeti Sırııanyń Ortalyq bankiniń jáne 23 uıymnyń, onyń ishinde bankter men munaı kompanııalarynyń aktıvterin buǵattaýdan bosatqan edi.

Buǵan deıin brıtan úkimeti Bashar Asad rejıminiń múshelerine qatysty sanktsııalar kúshinde qala beretinin málimdegen.

Aıta keteıik, Reseı Bashar Asadty Sırııaǵa ekstradıtsııalaýdan bas tartty.

AQSh Sırııadaǵy ásker sanyn qysqartady.