Ulybrıtanııa Reseıge qarsy sanktsııalar aýqymyn keńeıtti

LONDON. KAZINFORM - Ulybrıtanııa Reseıge qarsy aýqymy keń sanktsııalar tizimin jarııalady. Qara tizimge munaı tasymaldaıtyn tankerlerdiń 1kóleńkeli floty1 jáne Máskeýdiń negizgi saqtandyrý kompanııasy da endi, dep habarlaıdy Kazinform-nyń Ulybrıtanııadaǵy tilshisi.

Bul sharalar Reseıge batystyq sanktsııalardy aınalyp ótýge kómektesetin júzdegen munaı tankerine jáne olardyń soqtyǵysýy men munaıdyń tógilýi sııaqty táýekelderden saqtandyratyn «Ingosstrah» kompanııasyna qarsy baǵyttalǵan, delingen Ulybrıtanııa úkimetiniń málimdemesinde.

Tizimge ónerkásiptiń ár túrli salasynan barlyǵy 50 zańdy jáne jeke tulǵa engen.

Bul shekteýler BUU-daǵy keme qatynasyn baqylaý organy teńizde júk tasymaldaıtyn flottyń ósýine baılanysty alańdaýshylyq bildirgennen keıin engizildi. Degenmen sanktsııalardyń qanshalyqty tıimdi bolatyny ázirge belgisiz.

Buǵan deıin keıbir reseılik kemeler AQSh sanktsııalarynan keıin saýda-sattyqty ádettegishe júrgize almaı qınalǵan bolatyn. Iran men Venesýela sııaqty sanktsııaǵa ushyraǵan elder munaı eksportyn jalǵastyrý úshin kóleńkeli kemelerdi jyldar boıy paıdalanyp kelgeni belgili.

Sársenbide jarııalanǵan sanktsııalar AQSh-tyń osyǵan uqsas áreketteriniń jalǵasy. Aldaǵy ýaqytta Eýropalyq Odaq ta osyndaı qadamǵa barmaq. EO 10 shaqty kemege qarsy sanktsııa engizýdi usynyp otyr. Ulybrıtanııa úkimeti bul qadamdardyń «Úlken jetilikke» múshe eldermen kelisilgenin aıtty.

Munaı eksportyna qarsy sharalarǵa qosymsha retinde suıytylǵan tabıǵı gaz sektoryna baǵyttalǵan shekteýler de engizildi.

Sonymen qatar sanktsııalar Máskeý qor bırjasyna, Reseı qarýly kúshterine, sonyń ishinde Qytaıda, Izraılde, Qyrǵyzstanda jáne Túrkııada ornalasqan uıymdarǵa, sondaı-aq Soltústik Koreıadan Reseıge áskerı taýarlardy tasymaldaıtyn kemelerge qarsy baǵyttalǵan.