Ulybrıtanııa premer-mınıstri Kır Starmer otstavkaǵa ketetinin málimdedi
ASTANA. KAZINFORM – Ulybrıtanııa premer-mınıstri Kır Starmer jergilikti saılaýda Leıborıster partııasy úshin kóńilsiz nátıjelerden keıin kúsheıgen partııaishilik qysymǵa baılanysty partııa jetekshisi qyzmetinen ketetinin málimdedi, dep habarlaıdy Euronews.
Ol jańa basshy saılanǵanǵa deıin Úkimet basshysy mindetin atqara beretinin, al izbasardy tańdaý rásimi shilde aıynda bastalatynyn aıtty.
Daýnıng-strıttegi №10 rezıdentsııa aldynda sóılegen sózinde Starmer emotsııasyn áreń tejedi. Ol partııanyń sheshimin qarsylyqsyz qabyldaıtynyn aıtyp, mundaı qadamǵa barý sebepterin túsindirdi.
– Men qabyldaǵan árbir sheshim ózim súıetin eldiń múddesin birinshi orynǵa qoıýǵa baǵyttaldy. Sondyqtan men Leıborıster partııasynyń jetekshisi qyzmetinen ketemin, – dedi ol.
Sóziniń sońynda Starmer otbasyna kóbirek ýaqyt bólgisi keletinin aıtty.
– Eldegi eń mańyzdy qyzmetten ketkennen keıin men ózim úshin eń mańyzdy rólge kóbirek ýaqyt bóle alamyn. Ol – tamasha jubaıym Vıkı úshin jaqsy kúıeý jáne keremet balalarym úshin jaqsy áke bolý. Olar – meniń maqtanyshym ári qýanyshym, – dedi Starmer.
Saıası betburys Úlken Manchesterdiń burynǵy meri Endı Bernhem Meıkerfıld okrýgindegi mańyzdy qosymsha saılaýda jeńiske jetkennen keıin sózsiz bola tústi. Ol Qaýymdar palatasynan oryn alyp, Starmerdiń ornyna kelýi yqtımal basty úmitker retindegi pozıtsııasyn nyǵaıtty.
Otstavka týraly habar saıası spektrdiń eki jaǵynan da jedel reaktsııa týdyrdy. Reform UK partııasynyń jetekshisi Naıdjel Faradj kezekten tys jalpyulttyq saılaý ótkizýdi talap etip, qoǵamnyń jabyq kelissózder arqyly alǵa shyǵarylǵan kezekti «kásibı saıasatkerdi» qabyldamaıtynyn málimdedi.
Óz kezeginde Eýropalyq komıssııanyń tóraǵasy Ýrsýla fon der Lıaıen Starmerdiń memlekettik qaıratker retindegi ustanymyn joǵary baǵalap, onyń bılikte bolǵan eki jyl ishinde Eýropa men Ýkraınanyń qaýipsizdigin nyǵaıtýǵa qosqan úlesin atap ótti.
Aldaǵy bılik aýysýy Ulybrıtanııanyń on jyl ishinde jetinshi premer-mınıstrin qabyldaýǵa daıyndalyp jatqanyn bildiredi. Bul Vestmınsterdegi buryn-sońdy bolmaǵan saıası turaqsyzdyqtyń kórsetkishi sanalady.
Eske sala ketsek, osydan onshaqty kún buryn ǵana Kım Starmer men Sanae Takaıtıdiń Ulybrıtanııa men Japonııa arasyndaǵy 24 mlrd dollar bolatyn ınvestıtsııalar týraly kelisimge qol qoıǵanyn jazdyq.
