Ulybrıtanııa Ózbekstannyń DSU-ǵa qosylýy úshin tehnıkalyq kómek kórsetedi

TAShKENT. KAZINFORM – Ulybrıtanııa Ózbekstannyń Dúnıejúzilik saýda uıymyna (DSU) qosylý nıetine qoldaý bildirdi, dep habarlaıdy Kazinform agenttiginiń menshikti tilshisi.

Ózbekstan Syrtqy ister mınıstrligine qarasty Dunyo aqparat agenttiginiń málimetinshe, prezıdenttiń DSU máseleleri jónindegi arnaıy ókili Azızbek Ýrýnov Ulybrıtanııa bıznes jáne saýda mınıstriniń orynbasary Garet Tomaspen kezdesti.

Onyń barysynda taraptar ózara yntymaqtastyqty tereńdetý múmkindikterin talqylady. Sonymen qatar, Ulybrıtanııa Ózbekstannyń DSU-ǵa múshe bolý nıetine qoldaý bildirdi.

- Qos tarap kelissózdi aıaqtaýǵa múddeli. Sondyqtan bul protsess uzaqqa sozylmaıdy dep senemiz, - dep pikir bildirdi A.Ýrýnov.

Kezdesý qorytyndysy boıynsha resmı London DSU-ǵa qosylý jolynda Tashkentke tehnıkalyq qoldaý kórsetýge ýáde etti.

Eske salaıyq, taıaýda prezıdent Shavkat Mırzıeev Ózbekstannyń Dúnıejúzilik saýda uıymyna qosylý protsesi aıaqtalýǵa jaqyn ekenin málimdep edi.

Buǵan deıin DSU-ǵa qosylý boıynsha Ózbekstan AQSh jáne Qytaımen arada ótken kelissózderdi qorytyndylady.