Ulybrıtanııa Orta dáliz boıyndaǵy jobalarǵa ınvestıtsııa salýǵa nıetti
ASTANA. KAZINFORM – Ulybrıtanııa Azerbaıjannyń avıatsııa salasyndaǵy alǵashqy mámileni júzege asyrdy jáne Qazaqstan men Grýzııadaǵy porttar men temirjoldardy jańǵyrtý jobalaryn qarastyryp jatyr, dep habarlaıdy Kazinform agenttiginiń menshikti tilshisi.
Ulybrıtanııa Orta dáliz boıyndaǵy ınfraqurylymdyq jobalarǵa qyzyǵýshylyǵyn rastady. Bul týraly Ulybrıtanııanyń Ázerbaıjan jáne Ortalyq Azııa elderindegi saýda máseleleri jónindegi ókili, Lordtar palatasynyń múshesi Djon Alderdaıs Londonda ótken Kaspıı óńirindegi kólik baılanysyna arnalǵan konferentsııada málimdedi.
— Orta dálizdiń damýy — aımaqtaǵy barlyq el úshin basymdyqqa aınalýy tıis. Bul baǵyt Eýrazııa-Kaspıı keńistigi úshin orasan ekonomıkalyq paıda ákeledi, — dedi lord Alderdaıs.
Saıasatkerdiń aıtýynsha, Ulybrıtanııanyń eksporttyq-nesıelik agenttigi (UKEF) Ázerbaıjannyń avıatsııa salasynda alǵashqy kelisimdi júzege asyrǵan jáne qazirgi ýaqytta Qazaqstan men Grýzııadaǵy porttar men temirjol ınfraqurylymyn jańǵyrtý jobalaryn zerdelep jatyr.
Eýropalyq qaıta qurý jáne damý bankiniń baǵalaýyna sáıkes, Orta dálizdiń áleýetin tolyq ashý úshin shamamen 18,5 mıllıard eýro kóleminde ınvestıtsııa qajet. Bul qarajat porttardy keńeıtýge, jyljymaly quramdy jańartýǵa jáne logıstıkalyq habtar salýǵa jumsalýy tıis. Alaıda, Lord Alderdaıs atap ótkendeı, «jumsaq» ınfraqurylym da asa mańyzdy: saýda standarttaryn birizdendirý, rásimderdi tsıfrlandyrý jáne kedendik formaldylyqtardy jeńildetý qajet.
Ol sondaı-aq ótken aptada usynylǵan Ulybrıtanııanyń jańa saýda strategııasyna toqtaldy. Lordtyń aıtýynsha, bul qujattyń basty maqsaty — Ulybrıtanııany álemdegi eń joǵary baılanysqan elge aınaldyrý.
— Bizdiń strategııa aımaqtyq jobalardy damytýda Ulybrıtanııa — senimdi jáne minsiz seriktes ekenin naqty kórsetip otyr, — dedi ol.
Lord Alderdaıs brıtandyq tájirıbe, ınnovatsııalar men qarjylyq tetikter aımaq ınfraqurylymyn damytýǵa naqty úles qosyp jatqanyn aıtty. UKEF pen jetekshi brıtandyq bankter temirjoldan bastap avtojoldarǵa deıingi iri jobalardy belsendi qoldap otyr. Buǵan qosa, Ulybrıtanııa úkimeti ózderiniń jańa ónerkásiptik strategııasy aıasynda £20 mlrd kóleminde qosymsha qarjylandyrý paketin bólgen.
— Byltyr biz Qazaqstan, Qyrǵyzstan jáne Ózbekstannyń London qor bırjasy arqyly sýverendi oblıgatsııalar shyǵaryp, $10 mlrd kóleminde ınvestıtsııa tartýyna kómektestik. Bul — óńirlik baılanys jobalaryna qarjy salýǵa múmkindik beretin mańyzdy jetistik, — dedi ol.
Sóziniń sońynda Djon Alderdaıs Ulybrıtanııa tek qarjylyq qoldaýmen ǵana shektelmeı, jobalaý men qurylys salasyndaǵy aldyńǵy qatarly tehnologııalaryn da usyna alatynyn atap ótti. Tsıfrlyq modeldeý quraldary qurylys sapasyn arttyryp, shyǵyndy azaıtyp, jobalardy iske asyrý merzimin qysqartýǵa múmkindik beredi — bul kólik ınfraqurylymyn turaqty damytý úshin asa mańyzdy.