Ulybrıtanııa men Irlandııada «Eovın» daýylyna baılanysty júzdegen reıs toqtatyldy

ASTANA. KAZINFORM — Qatty jel týraly shuǵyl eskertýler búkil Irlandııany jáne Shotlandııanyń keıbir bóligin qamtyp otyr, dep habarlaıdy Sky News.

Ulybrıtanııadaǵy temirjol jáne áýe qatynasy toqtatylyp nemese keshiktirilip otyr, al Soltústik Irlandııada, Shotlandııanyń ortalyǵy men ońtústigindegi mektepter jabyldy.

Glazgo, Edınbýrg, Manchester, Nıýkasl, Lıverpýl jáne Dýblın áýejaılarynda júzdegen reıs toqtatyldy.

Londonnyń Hıtroý áýejaıy da juma kúni reısterdiń toqtatylǵanyn jáne senbide «az sany» toqtatylatynyn habarlady.

Birqatar memlekettik organ azamattardy eger bul óte mańyzdy bolmasa, saparǵa shyqpaýyn eskertti, al National Rail jolaýshylarǵa saparǵa shyqpas buryn sońǵy aqparatty tekserýge keńes berdi.

Irlandııada jeldiń jyldamdyǵy shamamen 183,5 km/saǵ bolyp tirkeldi. 

Qyzyl eskertýler Soltústik Irlandııada juma kúni tańǵy saǵat 07:00-den 14.00-ge deıin, al batys jáne ortalyq Shotlandııada 10.00-den 17.00-ge deıin kúshinde bolady.

Sary eskertýler Ulybrıtanııada da bar.

Buǵan deıin Tornado qaýpine baılanysty Ulybrıtanııanyń birqatar óńirinde sırek qyzyl dabyl belgisi jarııalanǵanyn jazǵan bolatynbyz.