Ulybrıtanııa men Frantsııanyń joıǵysh ushaqtary Sırııadaǵy DAISh nysanyna soqqy jasady

ASTANA. KAZINFORM — Shabýyl nysany Palmıranyń soltústigindegi taýlarda qarý-jaraq pen jarylǵysh zattar saqtalǵan jerasty qoımasy boldy, dep habarlaıdy Anadoly.

Koroldik áýe kúshteriniń (RAF) ushaǵy Frantsııamen birlesken operatsııa aıasynda DAISh-tiń (Qazaqstan Respýblıkasynda tyıym salynǵan uıym — red.) jer astyndaǵy qoımasyna soqqy jasady.

Ulybrıtanııa qorǵanys mınıstrliginiń málimetinshe, barlaý málimetterin muqııat taldaý arqyly orny anyqtalǵan qarý-jaraq pen jarylǵysh zattar qoımasy Palmıranyń soltústigindegi taýlarda ornalasqan.

Áskerıler Paveway IV basqarylatyn bombalaryn qoldandy, olar bastapqy baǵalaýlar boıynsha nysanaǵa sátti tıdi. Operatsııaǵa Voyager tanker ushaǵy qoldaý kórsetetin Typhoon FGR4 joıǵysh ushaqtary qatysty. Vedomstvo bombalaý aımaǵynda beıbit turǵyndardyń bolmaǵanyn atap ótti.

— Bul áreket Ulybrıtanııanyń kóshbasshylyǵyn jáne DAISh pen onyń Taıaý Shyǵystaǵy qaýipti, zorlyq-zombylyq ıdeologııasynyń qaıta jandanýyna jol bermeý úshin odaqtastarymyzben ıyq tirestirip turýǵa daıyn ekenimizdi kórsetedi, — dedi Ulybrıtanııa qorǵanys mınıstri Djon Hılı.

Eske salaıyq, buǵan deıin AQSh áskerı kúshteri Nıgerııa aýmaǵynda DAISh uıymynyń (Qazaqstan Respýblıkasynda tyıym salynǵan uıym — red.) sodyrlaryna soqqy jasaǵan edi.