Ulybrıtanııa men EO arasyndaǵy temirjol qatynasy ýaqytsha toqtady
ASTANA. KAZINFORM – Ulybrıtanııa men Eýropalyq odaq elderin jalǵaıtyn joǵary jyldamdyqty halyqaralyq temirjol qatynasy ýaqytsha úzildi. Brıýssel men London arasynda qatynaıtyn Eurostar kompanııasy La-Mansh týnnelindegi tehnıkalyq aqaýlarǵa baılanysty seısenbi kúni barlyq reısti toqtatty, dep habarlaıdy Kazinform agenttiginiń menshikti tilshisi.
Kompanııanyń resmı saıtynda jarııalanǵan málimetke sáıkes, baılanys jelisindegi aqaý men Le Shuttle poıyzynyń isten shyǵýy saldarynan La-Mansh týnneli ýaqytsha jabylǵan.
– Baılanys jelisindegi másele men Le Shuttle poıyzynyń buzylýyna baılanysty La-Mansh týnneli qazirgi ýaqytta jabyq. Ókinishke qaraı, qosymsha habarlanǵanǵa deıin búgingi barlyq reısti toqtatýǵa májbúrmiz, – delingen habarlamada.
Eurostar kompanııasy jolaýshylardy Brıýssel-Mıdı, Parıjdegi Soltústik vokzal jáne Londondaǵy Sent-Pankras vokzaldaryna barmaýǵa shaqyrdy.
Brıtandyq buqaralyq aqparat quraldarynyń habarlaýynsha, Anglııanyń Folkston qalasyndaǵy týnnel termınaly mańynda kólik keptelisi paıda bolyp, London men Parıjdegi vokzaldarda jolaýshylar kóptep jınalǵan.
Sonymen birge kompanııa La-Mansh týnnelinde jolaýshylar poıyzy qalyp qoıǵany týraly aqparatty joqqa shyǵardy. Eurostar ókili POLITICO basylymyna bergen túsiniktemesinde týnnelde buzylǵan júk vagon-shattl bolǵanyn jáne onyń týnnelden shyǵarylǵanyn aıtty.
La-Mansh týnneli Ulybrıtanııany qurlyqtaǵy Eýropamen baılanystyrady. Qalypty jaǵdaıda Londondaǵy Sent-Pankras vokzalynan Brıýssel-Mıdı stantsııasyna deıingi jol shamamen eki saǵatqa sozylady.
Sondaı-aq Ulybrıtanııadaǵy temirjol kompanııalaryn biriktiretin National Rail jolaýshylardy sapar josparlaryn qaıta qarap, brondaýdy basqa kúnge aýystyrýǵa shaqyrdy.
Aıta keteıik, buǵan deıin Meksıkada poıyz apatynan 13 adam qaza taýyp, 98 adam jaraqat alǵany habarlanǵan bolatyn.