Ulybrıtanııa men Ázerbaıjan áskerı áriptestikti kúsheıtýge kelisti

ASTANA. KAZINFORM – Ulybrıtanııa men Ázerbaıjan qorǵanys jáne qaýipsizdik salasyndaǵy yntymaqtastyqty tereńdetýge baǵyttalǵan Strategııalyq áriptestik týraly birlesken deklaratsııaǵa qol qoıdy. Bul týraly Anadolu agenttigi jazdy.

Ulybrıtanııa men Ázerbaıjan áskerı áriptestikti kúsheıtýge kelisti
Foto: Anadolu

Qujatqa beısenbi kúni Eýropalyq saıası qoǵamdastyq sammıtine qatysý úshin Irlandııaǵa barǵan Ulybrıtanııa premer-mınıstri Endı Bernhem men Ázerbaıjan prezıdenti Ilham Álıev qol qoıdy.

Deklaratsııaǵa sáıkes, eki el aımaqtyq beıbitshilik pen turaqtylyqty qoldaý, sondaı-aq ortaq qaýip-qaterlerdiń aldyn alý, olardyń jolyn kesý jáne olarǵa jaýap berý múmkindikterin arttyrý maqsatynda qorǵanys pen qaýipsizdik salasyndaǵy yntymaqtastyqty uzaq merzimdi negizde nyǵaıtýǵa nıetti.

– Taraptar joǵary deńgeıdegi baılanystardyń turaqty qarqynyn saqtaýǵa jáne ózara múddeli ekijaqty, aımaqtyq ári halyqaralyq máseleler boıynsha úılestirýdi tereńdetýge mindettenedi, – delingen qujatta.

Deklaratsııada taraptar áskerı daıyndyq, áleýetti arttyrý jáne ózara is-qımyl úılesimdiligin jetildirý baǵyttaryna basymdyq bere otyryp, qorǵanys salasyndaǵy yntymaqtastyqty damytatyny atap ótilgen. Sondaı-aq ortaq múddelerge saı baǵyttar boıynsha birlesken bastamalardy qosa alǵanda, qorǵanys ónerkásibi salasyndaǵy áriptestikti keńeıtý múmkindikteri qarastyrylady.

– Olar ózgerip jatqan qaýipsizdik jaǵdaılary men qaterlerge jaýap retinde qaýipsizdik salasyndaǵy basym baǵyttardyń keń aýqymy boıynsha yntymaqtastyqty nyǵaıtady, – delingen qujatta.

Eki eldiń basshylary ekijaqty saýda men ınvestıtsııalyq baılanystardy keńeıtip, tereńdetýge, sondaı-aq turaqty, barshaǵa ortaq jáne ártaraptandyrylǵan ekonomıkalyq ósýdi yntalandyrýǵa nıetti ekenin bildirdi.

Taraptar jańartylatyn energııa kózderi, ınfraqurylym jáne qyzmet kórsetý salalaryn qosa alǵanda, basym sektorlar boıynsha uzaq merzimdi kommertsııalyq áriptestikti damytý, bilim men tájirıbe almasý jáne ózara baılanysty nyǵaıtý arqyly ekonomıka, saýda jáne ınvestıtsııa salalaryndaǵy yntymaqtastyqty kúsheıtedi.

– Qatysýshylar aımaqtyq jáne halyqaralyq ózara baılanystyń mańyzyn atap ótip, transshekaralyq saýda men ınvestıtsııaǵa jaǵdaı jasaıtyn kólik, logıstıka jáne ınfraqurylym jobalarymen qatar, Orta dálizdi damytýǵa qoldaý kórsetedi, – delingen qujatta.

Deklaratsııaǵa sáıkes, taraptar saýda-ekonomıkalyq yntymaqtastyq pen tehnıkalyq dıalogty damytý tetigi retinde Saýda-ekonomıkalyq yntymaqtastyq jónindegi birlesken úkimetaralyq komıssııanyń róline erekshe mán bergen.

– Olar bul komıssııany ınvestıtsııa, ekonomıkany ártaraptandyrý, Orta dálizdi damytý jáne energetıka salasyndaǵy yntymaqtastyq boıynsha birlesken bastamalardy ilgeriletýdiń negizgi alańy retinde paıdalanady, – delingen qujatta.

Sondaı-aq eki el bilim berý jáne kásibı daǵdylardy damytý salasyndaǵy yntymaqtastyqty tereńdetedi. Bul baǵyt joǵary bilimdi, kásiptik bilim men daıarlyqty, tsıfrlyq jáne tehnıkalyq daǵdylardy, sondaı-aq eńbek naryǵy men memlekettik basqarý salasyndaǵy ózgermeli qajettilikterge saı basshylar men memlekettik sektor qyzmetkerlerin oqytýdy qamtıdy.

– Qatysýshylar osy deklaratsııanyń úsh negizgi baǵyty boıynsha qol jetkizilgen nátıjelerdi baǵalaý, bolashaqtaǵy yntymaqtastyqtyń basymdyqtaryn aıqyndaý jáne naqty keıingi qadamdardy kelisý úshin Strategııalyq áriptestik jónindegi kezdesýdi jyl saıyn ótkizý týraly ýaǵdalasty, – delingen qujatta.

Eske sala ketsek, buǵan deıin AQSh, Ázerbaıjan jáne Armenııa TRIPP jobasy boıynsha tehnıkalyq toptar qurǵanyn jazdyq.

Onyń aldynda Ázerbaıjan, Armenııa jáne AQSh beıbit kelisimderdi júzege asyrýǵa beıildi ekenin rastaǵanyn habarlaǵan edik.