Ulybrıtanııa memlekettik qyzmetiniń basshysy laýazymyna alǵash ret áıel saılandy
ASTANA. KAZINFORM — Antonııa Romeo 110 jyldyq tarıhy bar mınıstrler kabınetiniń hatshysy laýazymyna alǵash ret taǵaıyndalǵan áıel boldy, dep habarlaıdy Kazinform agenttiginiń menshikti tilshisi.
Ulybrıtanııa premer-mınıstri Kır Starmer Antonııa Romeony mınıstrler kabınetiniń hatshysy laýazymyna jáne bir mezgilde memlekettik qyzmet basshysy etip taǵaıyndady.
Starmer ony brıtan halqyna qyzmet etý salasynda 25 jyldyq tájirıbesi bar, kórnekti memlekettik qyzmetshi dep sıpattady.
— Men premer-mınıstr bolǵannan beri onyń kásibıligi men nátıjege jetýge degen tabandylyǵyna tánti boldym. Eldegi otbasylar áli de qarjylyq qysymǵa ushyrap otyr, al bul úkimet ómir súrý qunyn tómendetýge, memlekettik qyzmetterdi nyǵaıtýǵa jáne qaýymdastyqtarymyzǵa degen maqtanysh sezimin qalpyna keltirýge baǵyttalǵan. Úkimettiń osy maqsattarǵa jetýine qoldaý kórsetetin kabınet hatshysy bolýy óte mańyzdy, — dedi ol.
Óz kezeginde Romeo memlekettik azamattyq qyzmettiń mańyzdy ekenin atap ótti jáne onyń jumysy úkimettiń tapsyrmalaryn tıimdi jáne nátıjeli oryndaýǵa negizdelýi tıis ekenin jetkizdi.
— Memlekettik azamattyq qyzmet — uly jáne erekshe ınstıtýt, men oǵan úlken qurmetpen qaraımyn. Bizdi nátıjeliligimiz, tıimdiligimiz jáne ınnovatsııalyq qadamdarymyz boıynsha, úkimettiń kún tártibindegi máselelerdi oryndaýymyz ben el aldyndaǵy mindetterdi sheshýimiz arqyly baǵalaý kerek, — dedi ol.
Romeo sońǵy 10 jyl ishinde birneshe mańyzdy mınıstrlikte turaqty hatshy qyzmetin atqardy: Saýda jáne bıznes mınıstrligi, Ádilet mınıstrligi jáne Іshki ister mınıstrligi. Bul mınıstrlikter Ulybrıtanııa úkimetindegi eń kúrdeli vedomstvolardyń biri bolyp sanalady.
Aıta keteıik, memlekettik qyzmet basshysy shamamen 500 myń qyzmetkerdi basqarady. Olar salyq, áleýmettik jáne zeınetaqy júıesi, sondaı-aq memlekettik saıasatty júzege asyrýmen aınalysady.
Mınıstrler kabınetiniń hatshysy laýazymy 1916 jyly quryldy. Ol premer-mınıstrdiń negizgi saıası keńesshisi bolyp esepteledi. Sondaı-aq, úkimet jumysyn úılestiredi jáne mınıstrler aldynda kabınet qyzmetiniń durys jumys isteýi úshin jaýap beredi.
Eske sala keteıik, buǵan deıin ótken jyldyń qarashasyna deıin Prınts Endrıý tıtýlyn ıelengen Endrıý Maýntbetten-Vındzor qyzmettik ókilettilikti teris paıdalaný kúdigi boıynsha tutqyndalǵan bolatyn.