Ulybrıtanııa korol otbasyn asyraýǵa jylyna jarty mlrd fýnt sterlıng jumsaıdy

ASTANA.KAZINFORM — Korol otbasyn kútip-baǵýǵa bıýdjetten resmı bólinetin 86 mıllıon emes, brıtandyq salyq tóleýshiler esebinen jylyna 510 mıllıon fýnt sterlıng (680 mıllıon dollar) jumsalady. Bul málimetti brıtandyq monarhııaǵa qarsy Republic uıymy keltirdi, dep jazady VVS.

Jańa baıandamasynda Republic qoǵamdyq uıymy patsha, hanzada men hanshaıymdarǵa ketetin shyǵyndardan bólek, Ulybrıtanııa qazynasyna shyǵyn keltiretin jer telimderi men jyljymaıtyn múliktiń kóp mólsheri memleketke emes, patshaǵa tıesili ekenin de kórsetti.

Tikeleı bıýdjetten qazirgi ýaqytta jylyna «egemen granty» dep atalatyn 86 mıllıon fýnt (shamamen 115 mıllıon dollar) bólinedi.

2011 jylǵy zańǵa sáıkes, bul soma Táj ıeleriniń (Crown Estate) monarh jyl saıynǵy granttyń ornyna memleketke beretin jyl boıǵy kiristerin eskere otyryp esepteledi. ıAǵnı, formasy men máni boıynsha, bul — Tájge ıelik etkennen túsken kiristiń belgili bir paıyzyn korol úıine qaıtarý.

Tájge ıelik London jáne basqa qalalardaǵy kóptegen jyljymaıtyn múlik, sondaı-aq keń kólemdi jer ýchaskelerin qamtıdy. Bul múliktiń jalpy quny — shamamen 16 mıllıard fýnt sterlıng, onyń barlyǵy jalǵa beriledi jáne 2023 jyly 443 mıllıon fýnt sterlıng tabys ákeldi.

Egemen granty koroldik otbasy men onyń saraılaryn ustaýǵa jáne saparlar men túrli sharalardy uıymdastyrý shyǵyndaryn ǵana jabady. Al kúzet, qaýipsizdik shyǵyndaryn óteýge jetpeıdi. Ol shyǵyndardy Republic 150 mıllıon fýntqa baǵalady.

Republic belsendileriniń pikirinshe, monarhtyń jalpy shyǵyny — jylyna 5-10 mıllıon fýnt sterlıngti quraýy kerek, al koroldiń jeke ózine jylyna 189 myń fýnt sterlıng kóleminde jalaqy berilýi kerek.

Antımonarhıster qazirgi jaǵdaıdy «halyqtyń aqshasyn orynsyz ysyrap qylý» dep sanaıdy.

«Patsha otbasyna jarty mıllıard fýnt sterlıng jumsap jatqanda, qysqy jylytý tólemderin qysqartý týraly qalaı aıtýǵa bolady?» — dedi Republic uıymynyń basshysy Grem Smıt.