Ulybrıtanııa koroli inisin barlyq ataǵy men rezıdentsııasynan aıyrdy

ASTANA. KAZINFORM — Ulybrıtanııanyń koroli Charlz III óziniń týǵan inisi, Djeffrı Epshteın isimen baılanysy bar dep aıyptalǵan hanzada Endrıýdi barlyq ataqtary men artyqshylyqtarynan aıyrdy, dep habarlaıdy BBC.

Basylymnyń málimetinshe, bul sheshim týraly resmı aqparat Býkıngem saraıynyń málimdemesinde jarııalanǵan.

— Búgin Uly mártebeli patsha hanzada Endrıýdiń barlyq áskerı jáne aqsúıektik ataqtary men qurmetti laýazymdarynan aıyrý rásimin resmı túrde bastady. Endi ol Endrıý Maýntbetten Vındzor degen esimmen ǵana belgili bolady, — delingen málimdemede.

Buǵan deıin Endrıýdiń Roıal-Lodjdaǵy rezıdentsııasyn jalǵa alý sharty oǵan sol jerde turýǵa zańdy quqyq berip kelgen. Alaıda kelisimsharttyń buzylǵany týraly resmı habarlama bar, endi ol basqa jeke úıge kóshpek.

Sonymen qatar korol Charlz III óz málimdemesinde: «Ol óz oılary men shynaıy janashyrlyǵy árqashan zorlyq-zombylyq qurbandaryna jáne aman qalǵandarǵa baǵyttalǵanyn jáne solaı bolyp qala beretinin atap ótti», dep jazdy BBC.

Buǵan deıin Epshteın isi boıynsha jarııalanǵan sońǵy qujattarda Ilon Mask pen hanzada Endrıýdiń esimderi atalǵan edi. Keıinirek Endrıý hanzada marqum Elızaveta II patshaıym syılaǵan ataqtarynan óz erkimen bas tartatynyn málimdegen. Sońǵy kúnderi Ulybrıtanııa monarhy Charlz III de inisimen baılanysty daýǵa baılanysty jurt tarapynan syn men narazylyqqa ushyraǵan edi.

Eske sala ketsek, Ulybrıtanııanyń AQSh-taǵy elshisi Epshteınmen baılanysy úshin qyzmetinen ketken.

Budan buryn AQSh prezıdenti Donald Tramp The Wall Street Journal basylymyn sotqa beremin dep qorqytyp, Epshteın isiniń keıbir materıaldaryn jarııalaýdy talap etkenin jazǵan edik.