Ulybrıtanııa koroli Charlz III qaterli isiktiń janama áserine baılanysty aýrýhanaǵa tústi

ASTANA. KAZINFORM — Saqtyq úshin monarhtyń baǵdarlamasy erteńge aýystyrylady, dep jazdy Anadoly saıty. 

Ulybrıtanııa koroli Charlz III onkologııalyq aýrýdy emdeýdiń ýaqytsha janama áserine baılanysty aýrýhanaǵa jatqyzyldy, dep habarlaıdy Býkıngem saraıy.

— Búgin tańdaǵy josparly ári jalǵasyp jatqan emnen keıin korol ýaqytsha janama áserdi sezgen. Bul jaǵdaı aýrýhanada qysqa merzimdi baqylaýdy qajet etti. Osy sebepti Mártebeliniń kúndizgi baǵdarlamalary keıinge qaldyryldy, — delingen mátinde.

Sonymen qatar, saqtyq sharasy retinde dárigerlerdiń usynysyna sáıkes koroldiń erteńgi baǵdarlamasy keıinge shegeriletini habarlandy.

2024 jyldyń qańtarynda Korol Charlz III qýyq asty beziniń adenomasynan emdeletini aıtylǵan edi.

Korol 26 qańtarda aýrýhanaǵa jatqyzylyp, 29 qańtarda úıine shyǵaryldy. Býkıngem saraıy 5 aqpanda koroldiń qaterli isikke shaldyqqany test nátıjeleri boıynsha anyqtalǵanyn habarlady.

Buǵan deıin jazǵanymyzdaı, Korol Charlz III qýyqasty beziniń ulǵaıýyna baılanysty jasalǵan otadan keıin London aýrýhanasynan shyqty.