Ulybrıtanııa Irannyń ıadrolyq nysandaryna AQSh-tyń soqqylaryn qoldady

ASTANA. KAZINFORM Ulybrıtanııanyń Premer-mınıstri Kır Starmer AQSh-tyń Irannyń ıadrolyq nysandaryna jasaǵan soqqylaryna qatysty pikir bildirdi, dep habarlaıdy Kazinform agenttiginiń menshikti tilshisi.

Starmer Iranda ıadrolyq qarý jasaýdyń yqtımal damýy tóndirip otyrǵan qaterdiń mańyzdylyǵyn atap ótip, ony joıýǵa baǵyttalǵan AQSh-tyń áreketin qoldady.

— Irannyń ıadrolyq baǵdarlamasy halyqaralyq qaýipsizdikke eleýli qater tóndiredi. Iranǵa ıadrolyq qarý jasaýǵa eshqashan ruqsat berilmeýi kerek, al AQSh bul qaterdi joıý úshin tıisti shara qabyldady, — dep jazdy Starmer «X» áleýmettik jelisindegi paraqshasynda.

Óz málimdemesinde Starmer óńirdegi jaǵdaıdy turaqtandyrýdyń mańyzdylyǵyna da toqtalyp, Tegerandy dıplomatııalyq kelissózderge oralýǵa shaqyrdy.

— Taıaý Shyǵystaǵy jaǵdaı áli de turaqsyz. Óńirdegi turaqtylyqty qamtamasyz etý basty mindet. Biz Irandy kelissózder ústeline qaıta otyrýǵa jáne bul daǵdarysty toqtatýǵa baǵyttalǵan dıplomatııalyq sheshim tabýǵa shaqyramyz, — dedi ol.

Brıtandyq The Telegraph gazetiniń habarlaýynsha, Ulybrıtanııa AQSh-tyń Irannyń ıadrolyq nysandaryna jasaǵan áýe shabýyldaryna qatyspaǵan, alaıda premer-mınıstr Starmer bul operatsııa josparlary týraly aldyn ala habardar bolǵan.

Buǵan deıin Iran óziniń ıadrolyq nysandaryna AQSh-tyń jasaǵan soqqylaryna jaýap bergeni týraly habarlanǵan.

Islam revolıýtsııasy saqshylary korpýsy (KSIR) bul áreket Iran men Izraıl arasyndaǵy zymyran jáne dron shabýyldarynyń odan ári ýshyǵýyna ákelip, qaqtyǵystyń Taıaý Shyǵysta tolyqqandy soǵysqa aınalǵanyn málimdedi.

Keıin Qazaqstannyń Syrtqy ister mınıstrligi Taıaý Shyǵystaǵy jaǵdaıǵa baılanysty málimdeme jasap, ıadrolyq qarýdyń taralýyna jol bermeý maqsatynda kelisim ázirleýdi jedel qolǵa alýǵa shaqyrdy.