Ulybrıtanııa Irandaǵy soǵysqa baılanysty ómir súrý qunynyń ósýine qarsy kúres jarııalady
ASTANA. KAZINFORM — Ulybrıtanııa premer-mınıstri Kır Starmer Irandaǵy soǵysqa baılanysty kúnkóristiń qymbattaýynan zardap shekken brıtandyqtardyń jaǵdaıyn jeńildetý sharalaryn jarııalady, dep habarlaıdy TASS.
— Halyqaralyq turaqsyzdyq kezeńinde úkimet el ishindegi halyq úshin eń mańyzdy máselelerge nazar aýdarady: qazirdiń ózinde ómir súrý qunyn tómendetý jáne bolashaqtaǵy kúızelisterge eldiń daıyndyǵyn kúsheıtý, — delingen Ulybrıtanııa úkimeti basshysynyń keńsesi taratqan málimdemede.
Eń mańyzdy ózgeris — balalarǵa beriletin járdemaqyǵa qoıylǵan shekteýlerdi alyp tastaý. 2017 jyldan beri memlekettik kómek tek alǵashqy eki balaǵa berilip kelgen, bul másele boıynsha pikirtalastar kóp jyldar boıy jalǵasqan. Úkimettiń málimetinshe, bul shara 450 myń balany kedeılikten shyǵarýǵa múmkindik beredi.
Basqa sharalar zeınetkerlerdiń ósip jatqan shyǵyndaryn jabý jáne jumysshylardyń quqyqtaryn keńeıtý úshin qosymsha qoldaýǵa qatysty.
Irandaǵy soǵys kezinde Ulybrıtanııada naýryz aıynda benzınniń ortasha baǵasy 0,2 fýnt sterlıngke ($0,3) ósip, lıtrine 1,53 fýnt sterlıngke ($2,02) jetti. Bul statıstıka júrgizilgen ýaqyttaǵy eń joǵary aılyq ósim boldy. Al dızel otynynyń baǵasy odan da aıtarlyqtaı ósip, 0,4 fýnt sterlıngke ($0,5) qymbattap, lıtrine 1,83 fýnt sterlıng ($2,41) boldy. Munaı men gaz baǵasynyń kúrt ósýine baılanysty elektr energııasy, azyq-túlik baǵasy, ıpotekalyq nesıeni qosa alǵanda, paıyzdyq mólsherlemeler da artady degen boljam bar.
Osyǵan deıin Italııa mınıstri EO-ǵa janarmaı baǵasynyń ósýine qarsy sharalar qabyldaýdy usynǵany týraly jazǵanbyz.
