Ulybrıtanııa Irandaǵy elshiliginiń qyzmetkerlerin keri qaıtaryp jatyr

ASTANA. KAZINFORM – Ulybrıtanııa Irandaǵy elshiliginiń qyzmetkerlerin Iran men Izraıl qaqtyǵysyna baılanysty ýaqytsha keri shaqyrtyp jatyr, dep habarlaıdy Anadoly.

Ulybrıtanııa Syrtqy ister mınıstrliginiń jańartylǵan týrıstik eskertýinde London qyzmetkerleriniń qaýipsizdigin qamtamasyz etý maqsatynda tıisti sharalar qoldanǵany aıtylǵan.

- Elshilik qashyqtan jumys istep jatyr,- delingen habarlamada.

Ulybrıtanııanyń syrtqy ister mınıstri Devıd Lemmı X áleýmettik jelisinde el bıliginiń Tel-Avıvten Ulybrıtanııa azamattaryn evakýatsııalaý úshin charterlik reıster daıyndap jatqanyn habarlady. Bul sheshim áýe keńistigi ashylǵannan keıin qabyldandy.

Mınıstr Izraılde júrgen Ulybrıtanııa azamattaryn ózderiniń ornalasqan jeri týraly shuǵyl túrde habarlaýǵa shaqyrdy, osylaısha olar qajetti nusqaýlyqtar men aqparat ala alady.

Aıta keteıik, 2024 jylǵy 13 maýsymda Izraıl Iran Respýblıkasynyń qalalaryndaǵy ıadrolyq nysandar men Irannyń joǵary áskerı basshylyǵy ornalasqan jerlerge soqqy bere bastady.

Soqqylardyń saldarynan Iran qarýly kúshteri Bas shtabynyń bastyǵy, Islam revolıýtsııasy saqshylar korpýsynyń bas qolbasshysy, birneshe joǵary laýazymdy áskerı shendiler, sondaı-aq ıadrolyq zertteýler salasyndaǵy toǵyz ırandyq maman qaza tapty.

13 maýsym juma kúninen beri Iranda kem degende 585 adam qaza taýyp, 1300-den astam adam jaraqat aldy.

Jaýap retinde Iran Izraıl aýmaǵyna ballıstıkalyq zymyrandarmen soqqy jasady. Resmı málimetter boıynsha, bul shabýyldan 24 adam qaza taýyp, 500-den astamy jaralandy.

Túrkııany qosa alǵanda, birqatar elder Izraıldiń áreketterin qatań aıyptady.

Osyǵan deıin Iran men Izraıl arasyndaǵy shıelenis kúsheıe túskenin jazdyq.