Ulybrıtanııa EO-ǵa taýarlar boıynsha birtutas naryq qurýdy usyndy
ASTANA. KAZINFORM – Ulybrıtanııa úkimeti Eýropalyq Odaqqa ekijaqty qarym-qatynasty tereńdetý aıasynda taýarlar boıynsha birtutas naryq qurýdy usyndy, alaıda usynys qabyldanbady, dep habarlaıdy Report.
Basylym málimetinshe, Brıýssel óz kezeginde Londonǵa EO keden odaǵyna nemese Eýropalyq ekonomıkalyq aımaqqa qosylýdy usynǵan. Brıtan úkimeti bul nusqany qolaısyz dep baǵalaǵan.
2024 jyly Ulybrıtanııada Leıborıstik partııa qazirgi premer-mınıstr Kir Starmerdiń jetekshiligimen saılaýda jeńiske jetip, EO-ǵa qaıta oralmaýǵa jáne birtutas naryqqa nemese keden odaǵyna kirmeýge ýáde bergen bolatyn.
Gazet atap ótkendeı, is júzinde Starmer úkimeti burynǵy premer-mınıstr Tereza Meıdiń bastamasyna uqsas usynys jasaǵan. 2016–2019 jyldary premer bolǵan Meı Ulybrıtanııa men EO arasyndaǵy taýar qozǵalysyna birdeı erejeler engizýdi qoldaıtyn. Eýropalyq birtutas naryq sonymen qatar adamdardyń erkin qozǵalysyn da kózdeıdi, bul 10 jyl buryn Brexit sebepteriniń biri bolǵan.
Brıýsselde Londonǵa jasalatyn jeńildikter qaýymdastyq memleketteri arasynda eýroskeptıkterdiń, sonyń ishinde 2027 jylǵy prezıdenttik saılaýǵa daıyndalyp jatqan Frantsııadaǵy eýroskeptıkterdiń pozıtsııasyn kúsheıtedi dep sanaıdy.
Sol ýaqytta, The Guardian kórsetkendeı, brıtan úkimeti kem degende keıbir salalarda, sonyń ishinde azyq-túlik pen energetıka salasynda, EO birtutas naryǵyna qol jetkizý úmitin saqtap otyr.
Boljam boıynsha, bul máseleler Ulybrıtanııa men EO arasyndaǵy aldaǵy sammıtte talqylanatyn bolady. Ótkizý kúni áli bekitilmegen, biraq gazet málimeti boıynsha, is-shara 13 shildede ótýi múmkin. Kútilýde, taraptar veterınarlyq ónimder saýdasyn jeńildetýge baılanysty kelisim týraly jarııa etýi múmkin.
Aıta keteıik, Qazaqstanǵa kelgen Ulybrıtanııanyń jańa saýda komıssary Ortalyq Azııamen ekonomıkalyq baılanystar jańa kezeńge ótetini týraly aıtty.
