Ulybrıtanııa delegatsııasy Qazaqstannyń birqatar joǵary oqý oryndaryn aralady
ASTANA. KAZINFORM — Lord Djon Alderdaıs Astanadaǵy Coventry University jáne Cardiff University kampýstarymen tanysty. Bul týraly QR Ǵylym jáne joǵary bilim mınıstrligi jarııalady.
Lord Djon Alderdaıstyń basshylyǵymen Ulybrıtanııa delegatsııasy Qazaqstannyń birqatar joǵary oqý oryndaryna bardy. Eki el arasyndaǵy strategııalyq áriptestikti nyǵaıtý maqsatynda ótken is-sharaǵa QR Ǵylym jáne joǵary bilim mınıstri Saıasat Nurbek, Ulybrıtanııanyń Qazaqstandaǵy elshisi Sallı Aksýorsı, Qazaqstannyń Ulybrıtanııadaǵy elshisi Maǵjan Іlııasov, sondaı-aq Ulybrıtanııanyń Qazaqstandaǵy saýda jáne ınvestıtsııalar jónindegi óńirlik dırektory Amandıp Sanga qatysty.
Kezdesý barysynda delegatsııa Coventry University Kazakhstan jáne Cardiff University Kazakhstan kampýstarynyń qyzmetimen tanysty. Bul oqý oryndarynyń ashylýy Qazaqstan men Ulybrıtanııa arasyndaǵy halyqaralyq akademııalyq yntymaqtastyqty damytýdyń jáne seriktestik qatynastardy tereńdetýdiń mańyzdy kezeńi boldy.
Coventry University fılıaly 2024 jyly Astanada resmı túrde ashylyp, Qazaqstanda oqý úderisin bastaǵan alǵashqy brıtandyq ýnıversıtet atandy. Ýnıversıtet bıznes, halyqaralyq qatynastar, ekonomıka, qarjy jáne kompıýterlik ǵylymdar baǵyttary boıynsha bakalavrıat jáne magıstratýra baǵdarlamalaryn, sondaı-aq MBA Global Business jáne Executive MBA baǵdarlamalaryn júzege asyrady. Coventry University Kazakhstan zamanaýı bilim berý tehnologııalary men ınnovatsııalyq oqytý ádistemelerin engizip, halyqaralyq standarttarǵa saı akademııalyq orta qalyptastyrady. 2025 jyly ýnıversıtet basym baǵyttar boıynsha shamamen 200 stýdentke bilim grantyn usynýdy kózdeıtin stıpendııalyq bastamany iske qosty. Sondaı-aq zerthanalar, kitaphana jáne stýdentterge arnalǵan jataqhana qurylysy qamtylǵan kampýstyń ekinshi damý kezeńi júzege asyrylyp jatyr.
— Cardiff University fılıaly 2025 jylǵy 3 qyrkúıekte Astanada resmı túrde ashyldy. Bul ýnıversıtet — bedeldi Russell Group birlestigine múshe jáne Ortalyq Azııadaǵy osyndaı deńgeıdegi alǵashqy sheteldik kampýs. Cardiff University Kazakhstan Computer Science, Business Management, Civil Engineering, Exploration Geology baǵyttary boıynsha bakalavrıat baǵdarlamalaryn, sondaı-aq STEM jáne bıznes salalaryna arnalǵan daıyndyq (foundation) kýrstaryn usynady. Oqytý tolyqtaı aǵylshyn tilinde, Kardıff qalasyndaǵy ýnıversıtettiń professorlyq-oqytýshylyq quramynyń qatysýymen ótedi. Stýdentterge brıtandyq bilimniń qoljetimdiligin arttyrýǵa jáne Qazaqstannyń kadrlyq áleýetin damytýǵa baǵyttalǵan akademııalyq stıpendııalar men granttyq baǵdarlamalar qarastyrylǵan, — dep jazdy mınıstrliktiń baspasóz qyzmeti.
Kezdesý barysynda bilim jáne ǵylym salasyndaǵy ekijaqty yntymaqtastyqty odan ári damytý perspektıvalary talqylandy. Atap aıtqanda, eki el arasyndaǵy akademııalyq utqyrlyqty damytý, birlesken ǵylymı-zertteý jobalaryn júzege asyrý jáne oqý protsesine ınnovatsııalyq, tsıfrlyq sheshimderdi engizý máseleleri sóz boldy.
QR Ǵylym jáne joǵary bilim mınıstri Saıasat Nurbek Ulybrıtanııanyń jetekshi ýnıversıtetteriniń elimizde fılıaldaryn ashýy akademııalyq sapa, ınnovatsııa jáne jahandyq yqpaldastyq qaǵıdattaryna negizdelgen halyqaralyq bilim berý keńistigin qalyptastyrýǵa múmkindik beretinin atap ótti. Onyń aıtýynsha, Ulybrıtanııa ýnıversıtetterimen strategııalyq seriktestikti damytý adamı kapıtaldy nyǵaıtýǵa, joǵary bilim berý júıesiniń básekege qabilettiligin arttyrýǵa jáne qazaqstandyq dıplomdardyń halyqaralyq deńgeıde moıyndalýyna jol ashady.
Lord Djon Alderdaıstyń Qazaqstanǵa kelýi eki eldiń bilim, ǵylym jáne ınnovatsııalar salasyndaǵy yntymaqtastyqty odan ári tereńdetýge baǵyttalǵan ózara senim men qyzyǵýshylyqtyń joǵary deńgeıin kórsetti. Ulybrıtanııanyń jetekshi ýnıversıtetterimen birlesken bastamalardy iske asyrý turaqty akademııalyq baılanystar ornatýǵa, ǵylymı áleýetti damytýǵa jáne Qazaqstannyń aımaqtyq akademııalyq ortalyq retindegi mártebesin nyǵaıtýǵa yqpal etetin bolady.
Buǵan deıin mınıstr Saıasat Nurbek sheteldik stýdentter Qazaqstanǵa 30 mlrd teńge tabys ákeletinin aıtty.