Ulybrıtanııa bir jylda 250 myńǵa deıin jumys ornyn joǵaltýy múmkin
ASTANA. KAZINFORM – 2027 jyldyń ortasyna qaraı shırek mıllıon brıtandyq jumysynan aıyrylýy múmkin, dep habarlaıdy Kazinform agenttiginiń Londondaǵy menshikti tilshisi.
The Guardian gazetiniń jazýynsha, jetekshi aýdıtorlyq fırmalar Ernst & Young jáne Deloitte júrgizgen eki zertteý Taıaý Shyǵystaǵy geosaıası shıelenisterge baılanysty iskerlik seniminiń tómendeýi aıasynda Ulybrıtanııanyń ekonomıkalyq áleýetiniń aıtarlyqtaı nasharlaǵanyn kórsetip otyr.
Eki boljamdaǵy negizgi teris faktor – Iranǵa aınalasyndaǵy qaqtyǵystyń ýshyǵýy, sonyń ishinde teńiz saýda joldaryndaǵy jetkizilimniń úzilýi jáne energııa resýrstaryna baǵalardyń ósýi.
Brıtandyq Ernst & Young ekonomıkalyq boljam tobynyń baǵalaýynsha, Ulybrıtanııa ekonomıkasy bıylǵy jyldyń ekinshi jáne úshinshi toqsandarynda toqyraýǵa ushyraıdy. Ósim 2025 jylǵy 1,4%-dan bıyl 0,7%-ǵa deıin eki esege deıin tómendeıdi dep boljanyp otyr.
Odan bólek, jumyssyzdyq deńgeıi 2027 jyldyń ortasyna qaraı 5,8%-ǵa deıin (qazirgi deńgeı – 5,2%) artýy múmkin, bul rette shamamen 250 myń adam jumysynan aıyrylýy múmkin.
Inflıatsııanyń jedeldeýi de boljanyp otyr: 2026 jyldyń ekinshi jartysynda ol 4%-ǵa jaqyndaýy múmkin. Bul Anglııa Bankiniń 2%-dyq maqsatynan eki esege jýyq joǵary.
Deloitte jeke zertteýi Ulybrıtanııanyń iri kompanııalarynda qarjy dırektorlarynyń kóńil-kúıiniń aıtarlyqtaı nasharlaǵanyn kórsetti. Senim ındeksi -57%-ǵa deıin tómendedi (aldyńǵy toqsanda -13%), bul Covid-19 pandemııasy bastalǵan ýaqyttan beri eń tómengi deńgeı.
Saýalnamaǵa qatysqandardyń atap ótýinshe, bıznes úshin negizgi syrtqy qaýip – geosaıası turaqsyzdyq. Alańdaýshylyqtyń negizgi faktorlary qatarynda energııa resýrstary baǵasynyń ósýi (61%), ınflıatsııalyq qysym men paıyzdyq mólsherlemeler deńgeıi (61%) jáne kıbershabýyldyń kóbeıýi (60%) bar.
Táýekelderdiń artýyna jaýap retinde kompanııalar ınvestıtsııalyq baǵdarlamalardy qysqartý, shyǵyndardy baqylaýdy kúsheıtý jáne ótimdilikti arttyrýdy qosa alǵanda, konservatıvti qarjylyq saıasatqa ótip jatyr. Bul sharalar Ulybrıtanııada ekonomıkalyq belsendilik pen jumyspen qamtý dınamıkasyna qosymsha tejeýshilik áser etedi dep kútilip otyr.
Osyǵan deıin Tegeran AQSh-pen kelissózderdiń ekinshi raýndyna qatyspaıtynyn málimdegenin habarladyq.
