Ulybrıtanııa barlyq qurylǵylardy USB-C arqyly qýattaýǵa mindetteýi múmkin
ASTANA. KAZINFORM - Ulybrıtanııa úkimeti jańa elektrondy qurylǵylardyń barlyǵyna ortaq qýattaý kabeli retinde USB-C-di engizýdiń yqtımaldy artyqshylyqtaryn qarastyryp jatyr. Osyǵan uqsas zańdy jaqynda Eýropalyq Odaq qabyldaǵany belgili, dep habarlaıdy Kazinform tilshisi.
Qazan aıynda úkimet qoǵam jáne ónerkásip ókilderiniń basyn qosyp, zamanaýı elektronıkada keńinen qoldanylatyn USB-C kabeliniń artyqshylyqtaryn talqylady.
2022 jyly Eýro Odaqqa múshe memleketter dál osyndaı bastama kótergeni belgili. Jańa zań shaǵyn jáne orta elektrondy qurylǵylardy USB-C qýattaý kabelimen jabdyqtaýdy mindetteıdi jáne 2024 jyldyń jeltoqsanyna deıin júzege asýy tıis. Bul bastama elektrondy qaldyqtardy azaıtýǵa baǵyttalǵan.
Bastapqyda Ulybrıtanııa kórshi elderdiń kóshine ilesýdi josparlamaǵanymen, tutynýshylyq suranys pen ekologııalyq máselelerdi eskerip, óz ustanymyn qaıta qaraýdy jón dep tapty
Bastapqyda Apple kompanııasy bul ózgeriske uzaq ýaqyt kelispeı, zańǵa qarsylyq bildirgenimen, 2023 jyly iPhone 15 serııasymen shyqqan smartfondar úshin lightning kabelderin USB-C porttaryna aýystyrdy.
Tutynýshylar barlyǵyna ortaq ámbebap qýattaý kabelderine kóshý bastamasyn elektrondy qaldyqtardy azaıtýdaǵy mańyzdy qadam retinde joǵary baǵalady.
Derekterge sáıkes Ulybrıtanııada 600 mıllıonnan astam qoqysqa tastalatyn kabel bar. Materials Focus sııaqty ekologııalyq uıymdar tutynýshylardy paıdalanylmaǵan kabelderdi qaıta óńdeýge shaqyryp jatyr.
