Ulybrıtanııa Apple men Google-dan balalardy qorǵaý sharalaryn kúsheıtýdi talap etti
ASTANA. KAZINFORM — Ulybrıtanııa úkimeti Apple men Google kompanııalaryna shart qoıdy. Olar úsh aı ishinde kámeletke tolmaǵandarǵa ashyq foto men vıdeony túsirýge, kórýge jáne jiberýge múmkindik bermeıtin tehnologııalyq shekteýlerdi iske qosý qajet, dep habarlaıdy BBC.
Ulybrıtanııa úkimeti bul talap oryndalmaǵan jaǵdaıda kompanııalar zańdyq shekteýlerge, aıyppuldarǵa nemese tipti qylmystyq jaýapkershilikke tartylýy múmkin ekenin eskertti.
Bul týraly Londonda ótken Technology Week aıasynda premer-mınıstr Kır Starmer málimdedi. Onyń aıtýynsha, qajetti tehnıkalyq sheshimder qurylǵylarda burynnan bar, tek olardy mindetti túrde iske qosý qajet.
— Munda múmkin emes eshteńe joq. Bul kompanııalar — álemdegi eń ınnovatsııalyq kompanııalardyń biri, — dedi ol.
Tehnologııalar jónindegi mınıstr Lız Kendall shekteýler ár qurylǵyda balalar úshin ádepki túrde qosýly bolýy kerek ekenin naqtylady. Іshki ister mınıstri Shabana Mahmýd kompanııalardyń kámeletke tolmaǵandardy ashyq kontentten qorǵaýǵa «moraldyq mindeti» bar ekenin aıtty.
Google ókili balalardy qorǵaýǵa beıildilik bildirse, Apple tarapynan resmı túsinikteme berilmedi. Degenmen, eki kompanııanyń qurylǵylarynda da jalańashtyqty anyqtaıtyn fýnktsııalar bar, biraq olar ázirge kontentti buǵattamaı, tek eskertý beredi.
Qatań talaptardyń engizilýine brıtan bıliginiń derekterine sáıkes, 2024 jyly kámeletke tolmaǵandarǵa qatysty seksýaldyq qylmystardyń 91%-ynda ıntımdik sýretter balalardyń ózderi tarapynan qysym nemese bopsalaý nátıjesinde jasalǵany sebep bolǵan. Ortasha brıtandyq jasóspirim pornografııamen alǵash ret 13 jasynda kezdesedi.
Usynylǵan sharalar quqyq qorǵaýshylar tarapynan synǵa ushyrady. Big Brother Watch uıymynyń dırektory Sılkı Karlo bul bastamany «shekten shyqqan shara» dep atap, jasyn rastaý júıesi ınternette is júzinde pasporttyq baqylaýǵa ákelýi múmkin ekenin eskertti. Open Rights Group mundaı qadamdar smartfondardy baqylaý quralyna aınaldyrady degen qaýip bildirdi.
Aıta keteıik, Shveıtsııa 15 jasqa tolmaǵan balalardyń áleýmettik jelilerge kirýin shekteýi múmkin.
