Ulybrıtanııa, AQSh jáne Aýstralııa sýasty drondaryn ázirleý jobasyn iske qosty
ASTANA. KAZINFORM — Ulybrıtanııa, AQSh jáne Aýstralııa teńiz qaýipsizdigin kúsheıtý úshin jańa býyndaǵy sýasty drondaryn ázirleý jáne ornalastyrý jónindegi birlesken jobany bastady. Jańa tehnologııa 2027 jylǵa qaraı paıdalanýǵa beriledi dep josparlanyp otyr, dep habarlaıdy Euronews.
Bul týraly úsh eldiń qorǵanys mınıstrleri Sıngapýrda ótken qaýipsizdik jónindegi konferentsııa barysynda málimdedi.
Joba Ulybrıtanııa, AQSh jáne Aýstralııa arasyndaǵy AUKUS áskerı seriktestigi aıasynda júzege asyrylady.
Atalǵan odaq 2021 jyly qurylǵan.
Onyń maqsaty – qorǵanys tehnologııalaryn tereń yqpaldastyrý, ǵylymı ázirlemelerdi damytý jáne aqparat almasýdy keńeıtý.
Ulybrıtanııanyń qorǵanys mınıstri Djon Hılı jańa bastamanyń strategııalyq mańyzyna toqtaldy.
— Zamanaýı qorǵanys dál osylaı kórinedi. Biz Ulybrıtanııanyń qaýipsizdigin qamtamasyz etetin ozyq sýasty múmkindikterin iske qosyp otyrmyz. Sonymen qatar ekonomıkalyq ósimge úles qosyp jatqan brıtanııalyq kompanııalardy qoldaımyz jáne eń jaqyn odaqtastarymyzben ıyq tirese jumys isteımiz, — dedi ol.
Jańa tehnologııa mańyzdy sýasty kabelderi men qubyr jelilerin qorǵaýǵa arnalǵan.
Ulybrıtanııa men Eýropany gaz, elektr energııasy jáne ınternet jetkizetin myńdaǵan shaqyrymdyq sýasty ınfraqurylymy baılanystyrady.
Mundaı jelilerdiń zaqymdanýy baılanys júıeleri men energııa jetkizý tizbekteriniń jumysyna eleýli áser etýi múmkin.
2025 jyly Ulybrıtanııa Atlantic Bastion baǵdarlamasyn jarııalaǵan bolatyn.
Bul joba aıasynda avtonomdy kemeler men jasandy ıntellekt júıeleri áskerı kemeler jáne avıatsııamen birlesip sýasty kabelderi men qubyrlaryn qorǵaýǵa qatysady.
Sarapshylardyń baǵalaýynsha, sýasty drondary teńiz túbindegi strategııalyq nysandardy baqylaý jáne qorǵaý múmkindigin edáýir kúsheıtedi.
Aıta keteıik, osyǵan deıin Qazaqstanda dron óndirisi zerttelip jatqany týraly jazdyq.
