Ulybrıtanııa Iranǵa soqqy jasaý úshin AQSh-qa óz bazalaryn paıdalanýǵa ruqsat berdi
ASTANA. KAZINFORM — Bul týraly Londonda Kazinform agenttiginiń menshikti tilshisi habarlaǵan Ulybrıtanııa úkimetiniń resmı málimdemesinde aıtyldy.
Daýnıng-strıttiń habarlaýynsha, mınıstrler juma kúni Taıaý Shyǵystaǵy sońǵy oqıǵalardy talqylaý úshin kezdesti. Onda Irannyń áskerı emes kommertsııalyq kemelerge, azamattyq ınfraqurylymǵa, sonyń ishinde munaı-gaz obektilerine jasalǵan shabýyldary, sondaı-aq Ormýz buǵazyn bloktaýy qaraldy.
Málimdemede atap ótilgendeı:
— AQSh-qa Ulybrıtanııa bazalaryn qoldanýǵa ruqsat berý kelisimi aımaqtyq birlesken qorǵanys sheńberinde jasalǵan jáne onyń aıasynda AQSh qorǵanys operatsııalary júrgize alady. Bul operatsııalar Ormýz buǵazyndaǵy kemelerge jasalǵan shabýyldar úshin qoldanylatyn Irannyń zymyrandyq áleýetin álsiretýge baǵyttalǵan.
Ulybrıtanııa úkimeti Irannyń halyqaralyq keme qatynasyn maqsatqa aınaldyrý áreketterin aıyptady. Sondaı-aq, Irannyń, sonyń ishinde Ulybrıtanııa týy astyndaǵy kemeler men onyń jaqyn odaqtastary men seriktesteriniń kemelerine jasaǵan qaýipsizdigine qaýip tóndiretin shabýyldary aımaqtyq daǵdarysty kúsheıtýi jáne Ulybrıtanııa men búkil álemde ekonomıkalyq saldarǵa ákelýi múmkin dep sanaıdy.
Alaıda Ulybrıtanııa áli kúnge deıin tikeleı soqqylarǵa qatyspaıdy jáne Daýnıng-strıttiń málimdeýinshe, «Ulybrıtanııanyń qaqtyǵysqa qatysýdaǵy prıntsıpteri ózgergen joq».
AQSh prezıdenti Donald Tramp Ulybrıtanııanyń «kúrdeli sheshim qabyldaýda áldeqaıda jyldam áreket etýi tıis» ekenin aıtsa, Iran syrtqy ister mınıstri Abbas Arakchı Ulybrıtanııa premer-mınıstri Kır Starmerdiń «brıtandyq azamattardyń ómirin qaýipke tigip otyr» dep málimdedi.
Sońǵy málimet boıynsha, Eýropalyq Odaq Taıaý Shyǵystaǵy energetıkalyq obektilerge soqqylardy toqtatýdy talap etti.
