Ulybrıtanııa, AQSh, Frantsııa, Germanııa jáne Ýkraına syrtqy ister mınıstrleriniń kezdesýi ótpeıtin boldy
ASTANA. KAZINFORM – Londondaǵy Ýkraına boıynsha konsýltatsııalar formaty tómendedi. Kelissóz joǵary laýazymdy tulǵalar deńgeıinde ótedi, dep habarlaıdy Kazinform menshikti tilshisi.
Ulybrıtanııa, AQSh, Frantsııa, Germanııa jáne Ýkraına syrtqy ister mınıstrleri Ýkraınadaǵy soǵysty toqtatý joldaryn talqylaý úshin sársenbige Londonda josparlanǵan kezdesýdi keıinge qaldyrdy, dep jazdy Sky News.
Onyń ornyna osy elderdiń joǵary laýazymdy tulǵalarynyń qatysýymen konsýltatsııalar ótedi. Ýkraına Syrtqy ister mınıstri Andreı Sıbıha brıtandyq Forın-keńseniń basshysy Devıd Lemmımen bólek kezdesý ótkizedi dep kútilip otyr.
Ókildik reıtınginiń tómendeýi Donald Tramp komandasy tarapynan Kıev pen Máskeý arasyndaǵy atysty toqtatýǵa deldaldyq jasaý qysymynyń kúsheıýine qarama-qaıshy keledi.
Sky News aqparatyna sáıkes, AQSh usynyp otyrǵan bitimgershilik josparynda Ýkraına prezıdenti Vladımır Zelenskıı bir kún buryn qabyldamaǵan Qyrymdy taný máselesi bar. Ýkraına aýmaǵynyń shamamen 20 paıyzyn Reseıdiń baqylaýynda qaldyratyn maıdan shebin qatyrý múmkindigi de talqylanyp jatyr. Kıev mundaı sharttardy qarastyrýǵa daıyn ba, joq pa, ázirge belgisiz.
Sonymen birge Ýkraınanyń odaqtastary yqtımal aýmaqtyq jeńildikter Ýkraınaǵa qaýipsizdik kepildiginiń berilýimen jáne eldi soǵystan keıingi qalpyna keltirý úderisimen qatar júredi dep kútedi.
AQSh prezıdenti buǵan deıin soǵysty tez arada aıaqtaý nıeti týraly málimdegen, alaıda endi Reseı men Ýkraına kelisimge qol jetkizýge kedergi keltiretin bolsa, deldal bolýǵa qatysýdan bas tartýy múmkin ekenin eskertti.
AQSh Memlekettik hatshysy Marko Rýbıo Londonǵa Devıd Lemmımen jáne Ýkraına, Frantsııa jáne Germanııanyń syrtqy ister mınıstrlerimen kezdesýi úshin kelýi tıis edi, biraq seısenbi kúni sapardyń toqtatylǵany jarııalandy.
Sky News habarlaýynsha, osydan keıin Parıj men Berlın de mınıstrleriniń saparlaryn keıinge qaldyrdy. Olardyń ornyna syrtqy saıasaı vedomstvolardyń joǵary laýazymdy tulǵalary, sonyń ishinde AQSh prezıdentiniń Ýkraına boıynsha arnaıy ókili Kıt Kellog qatysady.
Buǵan deıin AQSh Ýkraınadaǵy jaǵdaıdy retteý jumystaryn toqtatýy múmkin ekenin jazǵan bolatynbyz.