Ulybrıtanııa 16 jasqa tolmaǵan balalarǵa áleýmettik jelige kirýge tyıym salady
ASTANA. KAZINFORM — Ulybrıtanııada 16 jasqa tolmaǵandarǵa Snapchat, TikTok, YouTube, Instagram, Facebook jáne X sııaqty platformalarǵa kirýge bolmaıdy. Tyıym 2027 jyldyń kókteminde kúshine enedi dep josparlanǵan.
DW agenttiginiń málimetinshe, ebul týraly eldiń premer-mınıstri Kır Starmer X áleýmettik medıa platformasynda málimdegen.
«Búgingi balalar tehnologııalar ómiriniń barlyq salasyna enip jatqan álemde óz ornyn tabýǵa májbúr. Men buǵan endi jol bere almaımyn. Sondyqtan biz balalarǵa balalyq shaǵyn qaıtaryp beremiz», — dep jazdy úkimet basshysy.
Tıisti sharalar Rojdestvo merekesine deıin parlament qaraýyna usynylady dep josparlanǵan. Zań erejeleri 2027 jyldyń kókteminde kúshine enýi múmkin.
Messendjerlerge tyıym salynbaıdy
Úkimet bul máselede Australia qoldanǵan úlgini engizýdi josparlap otyr. Tyıym Snapchat, TikTok, YouTube, Instagram, Facebook jáne X sııaqty platformalarǵa qatysty bolady. Al WhatsApp pen Signal sekildi messendjerlerge shekteý qoıylmaıdy.
Sondaı-aq bılik ókilderi 18 jasqa tolmaǵandarǵa áleýmettik jelilerdi túngi ýaqytta paıdalanýǵa tyıym salý jáne lentany sheksiz aınaldyrýǵa (skrollıngke) shekteý engizý múmkindigin qarastyryp jatyr. Bul jóninde tolyq aqparat shilde aıynda jarııalanady.
Budan bólek, romantıkalyq qarym-qatynas qyzmetterin usynatyn nemese paıdalanýshylarmen qarym-qatynasty, róldik oıyndardy ımıtatsııalaıtyn jasandy ıntellekt chat-bottary tek 18 jastan asqan azamattarǵa qoljetimdi bolady. Jalpy, ıntımdik sıpattaǵy fýnktsııalar kez kelgen JI negizindegi chat-bottarda 18 jasqa tolmaǵandar úshin shektelmek.
Aıta keteıik, Ulybrıtanııa Apple men Google-dan balalardy qorǵaý sharalaryn kúsheıtýdi talap etti.
