Qazaq «Janym — arymnyń sadaǵasy» degen ór namysty, aıbarly el — Prezıdent

ASTANA. KAZINFORM — Qazaqstan úshin eń basty maqsat — ult múddesin qorǵaý. Bul týraly Memleket basshysy Qasym-Jomart Toqaev elordada ótip jatqan Uly Jeńistiń 80 jyldyǵyna arnalǵan áskerı paradta aıtty.

— Biz Jeńistiń 80 jyldyǵyn atap ótýge basa nazar aýdardyq, elimiz boıynsha myńdaǵan mańyzdy, aýqymy keń is-shara ótkizilip jatyr. 500-ge jýyq kóshege Qazaqstan qaharmandarynyń esimi beriletin boldy. Elimizde qazaqstandyq maıdangerlerge arnalǵan «Batyrlarǵa taǵzym» atty sherý ótedi. Adamzat tarıhyndaǵy eń surapyl soǵysqa qatysýshylardyń urpaǵy atalarynyń sýretterin kóshelermen alyp júredi. Búgingideı jahandyq saıasatqa agressııa men qatygezdiktiń jegi qurty dendep engen kezeńde soǵystyń qasiretin elimizdiń barsha azamatyna túsindirý asa mańyzdy, — dedi Memleket basshysy.

Qasym-Jomart Toqaev aqıqatty tanymaı beıbitshiliktiń qadirin bilý múmkin emestigin basa aıtty.

— Soǵystyń tarıhı aqıqatyn, Uly Jeńistiń mán-maǵynasyn qasaqana burmalaýǵa jol berýge bolmaıdy. Qazirgi qubylmaly zamanda Qazaqstan úshin eń basty maqsat — ult múddesin qorǵaý. Syrtqy saıasatymyz osy maqsatty qamtamasyz etý úshin júrgizilip jatyr. Qazaq halqy — beıbit halyq. «Janym — arymnyń sadaǵasy» degen ór namysty, aıbarly el, — dedi Prezıdent.

Aıta keteıik, Astanadaǵy Táýelsizdik alańynda Jeńistiń 80 jyldyǵyna arnalǵan áskerı parad ótip jatyr.