«Uly Jeńiske arnalady»: Astanada rýhty kontsert ótti

Astana qalasynda da Jeńis kúnine oraı «Uly jeńiske arnalady!» atty merekelik kontsert ótti. Merekelik shara Astana qalasy ákimdigi janyndaǵy qalalyq alańda ótti.

Uıymdastyrýshylardyń aıtýynsha, kontserttiń basty maqsaty — Otan úshin janyn qıǵan qaharmandardy eske alyp, jas urpaqqa beıbit kúnniń qadirin túsindirý.

Kontsert shymyldyǵy E. Rahmadıev atyndaǵy Memlekettik akademııalyq fılarmonııasy úrlemeli orkestriniń patrıottyq shyǵarmalarymen túrildi. Túrli aspaptardyń úni men jandy daýysta oryndalǵan ánder kórermenge erekshe rýhanı áser syılady. Maıdan dalasynda sarbazdarǵa kúsh bergen shyǵarmalar da kontserttik baǵdarlamadan tys qalǵan joq.

Úrlemeli orkestrdiń oryndaýynda Jeńis kúniniń rýhyn sezindiretin «Den Pobedy» áni de shyrqaldy. Osy sátte kórermen ornynan turyp, ándi qosylyp aıtty. Bul kórinis erekshe qurmet pen iltıpattyń belgisin kórsetti.

Saltanatty is-sharaǵa qala turǵyndary bir kisideı qatysty. Jınalǵan qaýym beıbit kúndi syılaǵan batyrlardy eske alyp, umytylmas erlikterin dáriptedi.

— Kontsert týraly aqparatty ınternetten kórip, ádeıi tamashalaýǵa keldik. Jubaıym, balalarym jáne týystarymdy ertip ákeldim. Úrmeli aspaptar mýzykasy árdaıym jaǵymdy estilip, erekshe kóterińki kóńil kúı syılaıdy. Bári de kóńilge qonymdy, áserli ótip jatyr. Meniń arǵy atam Pavel de Azamat soǵysyna jáne Ekinshi dúnıejúzilik soǵysqa qatysqan. Ol kiside Qyzyl Juldyz ordeni bar. Soǵystan aman-esen oralyp, Eýropaǵa deıin jetken. Osyndaı rýhty kontsertke arǵy atamnyń sýretin de ala keldim, — deıdi Astana qalasynyń turǵyny Vıktor Kvachkov.

Munan soń kontsertte Qazaqstannyń eńbek sińirgen qaıratkeri Estaı Muqashev, «Daryn» memlekettik jastar syılyǵynyń laýreattary Aqbota Qusnadın men Muratbek Haırolda óner kórsetti. Árbir ónerpazdyń oryndaǵan áni kórermenniń ystyq qoshemetine bólendi. Tipti ánnen jiger alǵan jas balalar óz erkimen sap túzep, áskerı sálem berip ótti.

Sharaǵa kelgen turǵyndar jandy daýysta shyrqalǵan rýhty ánderdi tyńdap ózgeshe áser aldyq deıdi.

— Men Astanada alty jyl tursam da, mundaı kontsertke alǵash ret kelip turmyn. Sińlimdi de erte keldim, ekeýmiz birge kelip, kontserttiń bastalý sátin asyǵa kúttik. Atmosferasy erekshe áserli, óner men tarıhty qatar sezinýge múmkindik aldyq. Keıbir rýhty ánderdi tyńdaı otyryp, kózime jas aldym. Beıbit ómir syılaǵan ata-babalarymyzdyń erligi úshin raqmet. Astana qalasynyń ákimdigine osyndaı taǵylymy tereń, rýhty is-shara uıymdastyrǵany úshin alǵys bildiremin. Jeńis kúni qutty bolsyn! Elimizdiń aspany árqashan ashyq bolyp, beıbitshilik pen bereke saltanat qursyn, — dedi Astana qalasynyń turǵyny Gúldana Ashyqbaıqyzy.

Kontsertke jınalǵandardyń kópshiligi balalaryn jáne nemerelerin ertip kelgen. Olar jas urpaqtyń tarıhı Jeńis týraly tereńirek bilip óskenin qalaıdy. Soǵys jyldaryndaǵy ánder kórermenniń kóńilin de tolqytty. Jınalǵan jurt tereń áserge bólenip, kózderine jas aldy.

— Búgingi erekshe sharaǵa balalarymdy erte keldim. Ata-babamyz osydan 81 jyl buryn ne úshin janyn berip kúreskenin sezinsin degen maqsatpen alyp keldim. Beıbitshiliktiń ońaılyqpen kelmegenin uǵynsyn dedim. Qazirgi biz kórip otyrǵan barlyq baqyt — Jeńiske qatysqan árbir jannyń erligi men eńbeginiń nátıjesi. Balama da kontsert unap jatyr. Ekinshiden, ónerpazdardyń ónerine qarap, ónerge degen qyzyǵýshylyǵy artyp, sol baǵytta tárbıelensin dep alyp keldim, — dedi Astana qalasynyń turǵyny Rústem Ábdijappar.

Ekinshi dúnıejúzilik soǵystyń aıaqtalǵanyna 81 jyl tolýyna oraı uıymdastyrylǵan keshte Álııa Moldaǵulovanyń qurmetine arnalǵan «Álııa» áni de shyrqaldy. Bul óner týyndysy kópshiliktiń kóńilin tolqytty.

Al kontserttiń ekinshi bóliminde belgili sahna sańlaqtary óner kórsetti. Halyqaralyq baıqaýlardyń laýreattary Altynshash Muqataeva, Rınat Nurmuhan, Quralaı Meırambek syndy daryndy ánshiler de óz ónerin usyndy. «Shalqyma» halyq bı ansambliniń ulttyq bıleri de keshtiń kórkin asha tústi.

Búginde elimizde 58 soǵys ardageri bar. Shara uıymdastyrýshylar olardyń erligin nasıhattaýdy jyl boıy jalǵastyra bermek.